Banorët e fshatit Kçiq i Madh në komunën e Mitrovicës, po ankohen për ndotjen e lartë nga ujërat e zeza të cilat kalojnë afër shtëpive ku jetojnë banorë të shumtë.

Kanalet e hapura me ujëra të zeza i kanosin ndër vite banorët duke iu dëmtuar edhe tokat bujqësore.

Duke pasur parasysh që shëndeti i njeriut duhet të jetë prioritet, komuna e Mitrovicës nuk ka ndërmarrë masa për ta mënjanuar ndotjen që shkaktohet nga ujërat e zeza në këtë zonë.

Sot, në kohë pandemie këto kanale të hapura me ujëra të zeza sipër, janë frika më e madhe e banorëve të këtij fshati. Ata prej vitesh kanë bërë intervenime të vazhdueshme dhe përpjekje për të sanuar sado pak këtë vatër infeksioni, mirëpo mungesa e trajtimit adekuat ka rezultur që ky problem kërkon intervenim institucional e profesional.

Njëri nga banorët e këtij fshati thekson se gjatë mbrëmjes nga këto kanale avullojnë kundërmime të rënda, që njeherit ndikojnë edhe në shëndetin e komunitetit dhe fëmijëve në veçanti.

Duke kujtuar që fshati Kçiq I Madh është fshati më i madh në komunën e Mitrovicës, investimet në këtë fshat nuk i kanë përmbushur kërkesat elementare të banorëve. Përkundër kërkesave të bëra, ndër to:

• Rregullimi i ujërave të zeza.
• Ndriqimin publik.
• Vendosja e policëve rrugorë.
• Asfaltimi i disa rrugëve, etj,
  ende nuk është bërë ndonjë hap konkret nga komuna e Mitrovicës.

Nga këto pakënaqësi, sidomos nga rreziku i ndotjes së lartë, banorët kanë vendosur të ndërmarrin disa hapa konkret, duke mos e përjashtuar edhe protestën pranë institucioneve lokale.