Deputetja e Partisë Demokratike të Kosovës, Ganimete Musliu, ka zbuluar se për çfarë e kanë intervistuar sot në Komisionin për Mbikqyrjen e AKI-së, inspektorin e përgjithshëm, Burim Ramadani, shkruan Gazeta Express.

Ajo në emisionin “Frontal”, në T7, ka thënë se tema e intervistimit ka qenë helmimi i qytetarëve në Deçan.

“Ne e kemi ftuar për ta intervistuar për gjendjen e krijuar në Deçan nga helmimi. Është një çështje urgjente. E kemi ftuar me urgjencë nesër në raportim edhe kryetarin e AKI-së”, ka thënë ajo.

Musliu deklaroi se Ramadanin e intervistuan edhe për shkëputjen e disa kontratave të punëtorëve në AKI.

“Tema kyçe sot ka qenë shkëputja e disa kontratave të punëtorëve brenda AKI-së. Për këtë e intervistuar kryeinspektorin. Raportimi lë shumë për të dëshiruar. Bëhet fjalë për tri punëtore të cilat kanë qenë kyçe në tri zyret kryesore menaxheriale të AKI-së”, tha ajo.