Gjykata Evropiane për të Drejtat e Njeriut ka obliguar Moldavinë të paguajë nga 25 mijë euro secilin mësues që e kishte dëbuar drejt Turqisë, nën akuzat se kishin lidhje me lëvizjen e Gulenit.

Sipas kësaj gjykate, Moldavia ka shkelur të drejtat e qytetarëve të dëbuar në shtator të vitit 2018. Shtatë qytetarë të huaj, përfshirë pesë mësuesit nga rrjeti i shkollave “Orizont”, ishin arrestuar në një operacion të kryer nga shërbimi sekret moldav dhe ai turk. Ata ishin dërguar direkt në aeroport dhe ishin dëbuar drejt Turqisë. Askush nga familjarët e tyre, sipas gjykatës, nuk ishte në dijeni për disa javë për fatin e të dëbuarve, transmeton Koha.net.

Edhe pse Qeveria e Moldavisë thotë se nuk ishte në dijeni atë kohë për frikën e të arrestuarve për dëbim në Turqi, Gjykata Evropiane ka thënë se në aplikimet e tyre për azil ishte vërejtur qartë frika se mund të persekutohen në Turqi.

Në njoftim theksohet se mësuesit kishin aplikuar për azil në muajin prill, por atyre kjo u ishte refuzuar dhe në shtator ishin arrestuar e dëbuar drejt Turqisë. Në shtator dhe tetor të vitit 2018, avokatët e mësuesve kishin apeluar në gjykatë ndaj vendimit të shtetit moldav.