Aktivistit të Lëvizjes Vetëvendosje, Drin Zatriqit, i ishte ngritur aktakuzë nga Prokuroria e Ferizajt për veprën penale “Blerje, posedim, shpërndarje dhe shitje e paautorizuar e narkotikëve”, ndërsa Gjykata Themelore në Ferizaj po e kërkon atë. Për këtë, kjo gjykatë ka lëshuar dhe ka urdhëruar lëshimin e urdhërrreshtimit për Zatriqin.

Urdhëresa të cilën e ka siguruar Gazeta Sinjali përmes një burimi, thotë se aktakuza është ngritur me datë 24 nëntor të vitit 2011.

Gjykata Themelore në Ferizaj, duke u bazuar nga kjo aktakuzë ka caktuar seancë gjyqësore për të akuzuarin, por ky i fundit nuk është paraqitur në mënyrë të rregullt për shkak se nga fletëkthesa për dorëzim personal është konstatuar se i njejti ndodhet jashtë Kosovës.

Ndaj Drin Zatriqit, në shtator të vitit të kaluar është lëshuar urdhëresë për letër-rreshtim qëndror, pasi i ai nuk ndodhet në Kosovë. Sipas këtij dokumenti, në momentin që Zatriqi do të futet në Kosovë, ai do të shoqërohet nga Policia për në Gjykatën Themelore në Ferizaj.

Sipas një memorandumi zyrtar të Policisë së Kosovës, është konfirmuar se i akuzuari Drin Zatriqi gjendet në SHBA.

Kështu, Gjykata Themelore në Ferizaj, ka vendosur që posa i pandehuri të sigurohet që ndodhet në Kosovë të arrestohet dhe të shoqërohet në zyrat e kësaj Gjykate.

Drin Zatriqi, sa ishte në Kosovë, vite më parë ka qenë menaxher i disa këngëtarëve të estradës, ndërkaq së fundi nga SHBA-ja është aktivizuar politikisht në mbështetje të Lëvizjes Vetëvendosje.