Gjykata Themelore ka marrë vendim në favor të qytetarëve të Deçanit, duke kërkuar nga Ministria e Ekonomisë dhe Zyra e Rregullatorit të energjisë anulimin e lejeve ujore dhe mjedisore për kompaninë KELKOS për tri hidrocentralet në Deçan.

Padia ishte ushtruar nga tre banorët e Decanit, Faton Selmanaj, Muharrem Lulaj dhe Xhavit Kuçi ndaj Ministrisë së Ekonomisë dhe Ambientit dhe ndaj Zyrës së Rregullatorit të energjisë, ndërsa palë interesi ishte kompania KELKO-s. Padisë më pas i ishin bashkuar edhe OJQ Pishtarët nga Shpresa Loshaj dhe Grupi për Studime Juridike dhe Politike – GLPS.

Në vendim thuhet se aprovohet në tërësi si e bazuar padia dhe kërkohet që të anulohet leja ujore për Hidrocentralin Belaja, ajo për hidrocentralin Deçani dhe Leja ujore për hidrocentralin Lumbardhi. Po ashtu kërkohet edhe anulimi i lejes mjedisore për hidrocentralin Belaja dhe Deçani.

Nëpërmjet vendimit kërkohet anulimi i vendimit të Zyrës së Rregullatorit të Energjisë për operim dhe licenca për prodhimin të energjisë për HC Deçani dhe Lumbardhi.