Teologu Xhabir Hamiti ka reaguar për rastin ku një të varfëri i është kërkuar nga BIK në Vushtrri që të paguajë anëtarësinë në shumë prej 417 euro, nëse dëshironte që t’ia varrosnin nënën me ritualet e besimit islam.

Hamiti përmes një postimi në rrjetin social Facebook ka thënë që nëse zyrtarët e Këshilli të Bashkësisë Islma në Vushtrri ia kanë marrë paratë si kusht për ta varrosur nënën e tij, duke e ditur se ai është në gjendje të rëndë sociale, kanë bërë sipas tij gjestin më të ulët të mundshëm njerëzor.

“Ajo çfarë duhet të bëjnë zotëritë e këtij Këshilli, është që menjëherë t’ia kthejnë parat këtij burri dhe t’i kërkojnë falje. Nëse ngjarja është krejt kështu siç edhe u tha në lajmet e RTK-së, kjo është marri dhe në të njëjtën kohë idiotizëm”, thotë Hamiti.

Sabri Beqirit nga Akrshtica e Vushtrrisë, i cili jeton në varfëri të skajshme dhe merr asistencë sociale nga shteti, siç raporton RTK, atij dy ditë më parë i vdiq nëna, ndërsa Bashkësia Islame në Vushtrri e detyroi të paguajë për anëtarësinë shumën prej 417 eurove, nëse dëshironte që t’ia varrosin nënën me ritet e besimit islam.

Kryefamiljari u detyrua të shes viçin në mënyrë që nëna e tij të varrosej sipas ritit islam edhe pse udhëheqësit e Bashkësisë Islame të Kosovës kanë thënë se këto raste janë të lira nga pagesa.