OJQ “ETEA” dhe Kuvendi i të Rinjve të Prishtinës kanë hapur minibibliotekën në Kampusin Universitar, raporton Ekonomia Online.

Drejtori i ETEA-s, Agron Ahmeti, tha se kanë rifilluar punën me hapjen e minibibliotekave  të lagjeve pas sulmeve që u janë bërë.

 Ai tregoi se kjo është minibiblioteka e 7-të që po hapet dhe gjithsej 12 minibiblioteka do të hapen këtë muaj.

“Sot jemi në hapjen e minibibliotekës së 7-të me radhë këtu në oborrin e Kampusit Universitar. Minibibliotekat, shumica po funksionojnë, fatkeqësisht kemi pasur disa probleme në javët e kaluara në “Bregun e Diellit” dhe në “Lagjen e Spitalit”, të cilat kanë shkaktuar pezullim të procesit deri sa jemi marrë vesh që ato të zhvendosen në vende më të sigurta. Gjithsej do të hapen 12 minibiblioteka brenda këtij muaji”, tha Ahmeti, raporton Ekonomia Online.

Të tilla minibibloteka që u vendosën në lagje të kryeqytetit janë thyer më parë derisa ato janë vendosur nga organizata, me qëllim që gratis qytetarët të marrin libra, t’i lexojnë e kthejnë aty, e edhe të shtojnë libra të rinj në to.