Kryetari i AAK’së, Ramush Haradinaj, ka thënë se shtimi i numrit të pjesëtarëve të KFORit në Kosovë e dëshmon vendosmërinë e NATO’s se terrorizmi nuk kalon.

“Shtimi i numrit të pjesëtarëve të KFOR-it, brenda mandatit që ka, dëshmon vendosmërinë e NATO-s se terrorizmi nuk kalon. Paqja në Kosovë e në Ballkan është vendosur me shumë dhimbje e tragjedi dhe prandaj nuk do të lejojmë askënd që ta rrezikojë atë”.

Ai ka thënë se Kosova qëndron fuqishëm në mbështetje të të drejtave politike për të gjitha komunitetet.

“Si Kosovë qëndrojmë fuqishëm në mbështetje të të drejtave politike të të gjitha komuniteteve, edhe të komunitetit serb, kjo në bazë të Kushtetutës, ligjeve të Kosovës dhe në bazë të planit Franko- Gjerman të përkrahur nga Amerika”.

Haradinaj ka shkruar se faktet po zbardhen përditë dhe po dëshmojnë implikimin e thellë të Serbisë në organizimin e akteve terroriste. Sipas tij, Serbia nuk mund t’i ikë përgjegjësisë prandaj ka kërkuar një hetim ndërkombëtar.

“Faktet që po zbardhen përditë dëshmojnë për implikimin e thellë të Serbisë në organizimin e akteve terroriste në veri dhe shteti i Serbisë nuk mund t’i ikën përgjegjësisë. Prandaj kërkohet një hetim ndërkombëtar për të zbardhur skenarët e destabilizimit, jo vetëm të Kosovës por edhe të Ballkanit dhe për te nxjerrur para drejtësisë të gjithë ata që kanë qenë të përfshirë në këto sulme terroriste”.