Analisti Ylli Hoxha ka thënë se kostoja e vendimit të ndalimit të dinarit në Kosovë, do të jetë pranimi i Asociacionit të Komunave me Shumicë serbe.

Në emisionin “Debat Plus”, Hoxha, këtë e quan një ”kurth” të madh.

“Për fat të keq një vendim që ka qenë brilant, ka mundur të jetë armë e mirë për Kosovën në këtë betejë negociatore… Kostoja e heqjes së dinarit do të jetë pranimi i Asociacionit. Ky është një kurth i madh”, tha Hoxha.

“Tash po bisedojmë, besoj, është se do të bisedohet se si ky vendim të mos bie ndesh me hapa konkret me atë që janë bërë lëshime në marrëveshjen e Brukselit, në marrëveshjen e Ohrit në planin për Asociacionin. Bashkësia Ndërkombëtare do të insistojë në këtë dhe ky do të jetë fundi i kësaj çështjeje”.

Ai thekson se nuk ka dyshim që takimi në Bruksel ka qenë në nivel politik.

“Për mua ideja se Bislimi nuk ka shkuar në takim është më shumë një konsum i brendshëm, kushdo që të jetë nga Kosova diskutimi është thellësisht politik dhe nuk ka të bëjë me çështje teknike. Kjo qeveri do të dalë fitimtare sepse nuk ka kuptim që të mbetet dinari por ajo fitore do ta ketë koston e vendimit me atë që do të bëjmë lëshime, me atë që kemi pranuar në Bruksel, e cila aktualisht është jashtë kuadrit ligjor të Republikës së Kosovës. Çështja është teknike në momentin kur Serbia e pranon pikën e integritetit të institucioneve tona mbi territorin e Kosovës, të cilin nuk po e bën, të cilin po thotë se nuk e pranon”, tha ai.