Nënkryetari i Kuvendit, nga radhët e PDK-së Enver Hoxhaj, tha se ai është presoni i parë që i merr vesh qëndrimet e ndërkombëtarëve ende pa u bërë publike ato, raporton Ekonomia Online.

Madje ai thotë se ka informacione edhe shumë kohë më parë për atë se çka diskutohet në qarqet ndërkombëtare.

Prandaj thotë se gjendja në veri është shqetësuese dhe se kjo pjesë po lëviz drejt një protektorati, duke u kthyer në gjendje e pas luftës.

“Unë jam prej atyre në politikë i cili para se të dalin qëndrimet zyrtare e marr vesh se çka po diskutohet. Do të thotë para se të dal një deklaratë dhe para se dikush ta jap një qëndrim në raport me rrethanat në Kosovë unë e di debatin që zhvillohet javën e fundit, dy javët e fundit, apo muajin e fundit”.

“Arsyeja pse kam reaguar në raport me qëndrimit që OSBE ta ketë një rol në mbështetje të procesit zgjedhor në Kosovë ka të bëjë jo vetëm me roli gjatë procesit zgjedhor por ka të bëjë me situatë që veriu po lëviz duke shtuar praninë e madhe të KFOR-it, po lëviz drejt vendosjes së një protektorati. Kjo situatë është qetësuese për ne si parti”.

Ai madje tha se të gjitha veprimet që ka ndërmarrë kryeministri Albin Kurti do të dëmtojnë interesat afatgjate të vendit.

Për këtë thotë se janë shumë të shqetësuar ngase Qeveria nuk ka strategji e nuk po ndjek një politikë të mençur për veriun e vendit.

“Kjo gjendje do t’i dëmtojë interesat e Kosovës në planin afatgjatë. Prej asaj se si organizohen zgjedhjet do të varte shumë edhe realiteti i cili do të krijohet në veri të vendit. Shqetësimi im është se krejt çka ka ndodhur prej nëntorit të vitit të kaluar nga ana e z.Kurti i cili para se të vijë në pushtet ka thënë se do të diskutojë me dialog me serbët e Kosovës, ndërsa tash po shihni se nuk ka politikë sa i takon komitetit serb”.

“Dialogu është shndërruar në një instrument që i përmbush interesat e Serbisë. Vendim i tij për targat ka qenë i gabuar. Ne jemi kogja të shqetësuar nga mungesa e qartësisë strategjike, nga mungesa e një politikë të mençur se si të shtrihet sovraniteti i Kosovës në veri të venit. Nuk e di a ka vërtetë marrëveshjes pas Ohrit, apo është sikurse ka qenë më herët”.