Më shumë se 180 organizata i kanë bërë thirrje kompanive të modës që të ndalin bashkëpunimin me “furnizues të cilët shfrytëzojnë dhe keqpërdorin punëtorët” dhe të ndalin blerjen e pambukut nga provinca Xinjiang.

Nike, Gap, Patagoinia, dhe firmat si Calvin Clein dhe Tommy Hilfiger ishin në mesin e emrave të cilët janë lidhur me punë të detyrueshme të pakicave etnike në Kinë, sipas këtyre grupeve.

“E tërë industria e veshmbathjeve është e njollosur me punën e detyruar të Uighurëve dhe myslimanëve Turkik” ka thënë Koalicioni për Përfundimin e Punës së Dhunshme në Rajonin Uighur.

Shumica e kompanive të përmendura ose mohuan se blejnë produkte nga fabrikat në Xinjiang, ose se do të heqin këtë rajon nga zinxhiri i tyre i furnizimeve, shkruan The Independent.

Gjersa shumica e firmave të modës nuk furnizohen drejtpërdrejtë nga fabrikat në këtë rajon, ky koalicioni tha se shumica e produkteve të tyre përmbajnë pambuk i cili mblidhet nga Uighurët e keqtrajtuar e pastaj eksportohet përgjatë tërë Kinës dhe shitet nga furnizues tjerë.

Më shumë se 80% e pambukut në Kinë vjen nga Xinjiangu veriperëndimor, ku ekspertët e OKB-së vlerësojnë se së paku një milionë Uighurë dhe myslimanë tjerë po mbahen nëpër kampe të përqendrimit, transmeton KOHA.

“Nëse i përmbahemi biznesit të përgjegjshëm, atëherë kompanitë e modës duhet të veprojnë në momentin kur gazetarët e pavarur, ekspertët e të drejtave të njeriut nga OKB-ja, dhe organizatat për të drejtat e njeriut nxjerrin në pah keqpërdorimin e Uighurëve dhe grupeve tjera pakicë në Kinë”, tha Jennifer Rosenbaum, drejtoresha e të drejtës globale të punëtorëve tek Forumi i të Drejtave Ndërkombëtare të Punës.

Një hetim tjetër nga New York Times ka gjetur se kompanitë që po prodhojnë pajisje për mbrojtje kundër viruseve në Kinë po përdorin Uighurët të cilët bëjnë punë të detyrueshme nëpër kampet e përqendrimit në provincën Xinjiang të Kinë.