Kryeministri i Izraelit, Benjamin Netanyahu, ka deklaruar se vendi i tij dhe Shtetet e Bashkuara ndajnë të njëjtin qëndrim për çështjen bërthamore të Iranit.

Në një deklaratë zyrtare, Netanyahu theksoi se “sa të jem kryeministër i Izraelit, Irani nuk do të ketë armë bërthamore”, duke shtuar se ekziston “dakordësi e plotë” me presidentin amerikan Donald Trump për këtë çështje.

Ai tha se për më shumë se 30 vjet ka qenë në qendër të përpjekjeve ndërkombëtare kundër programit bërthamor iranian.

Sipas tij, pa këtë presion të vazhdueshëm, Irani do të kishte arritur prej kohësh të zhvillonte armë bërthamore që do të përdoreshin kundër Izraelit.

Netanyahu përsëriti gjithashtu akuzat ndaj Teheranit se synon shkatërrimin e shtetit izraelit dhe u shpreh se ka “kushtuar jetën” për të parandaluar një skenar të tillë.

Në fund të deklaratës, ai rikonfirmoi se gjatë mandatit të tij nuk do të lejohet që Irani të pajiset me arsenal bërthamor.