Joan Laporta ka thënë se presidenti Josep Bartomeu dhe Ronald Koeman kanë bërë aktin qyqar kur kanë telefonuar Luis Suarezin për t’i konfirmuar se nuk është më në planet e Barcelonës.

Në mediat spanjolle qarkulloi lajmi se trajneri i ri i skuadrës katalunase ka telefonuar sulmuesin uruguaian që t’i thoshte se është i lirë të kërkojë klub të ri.

Telefonata mes strategut holandez dhe Suarezit zgjati më pak se një minutë, me këtë të fundit që mbeti i acaruar nga sjellja e tij.

Ish-presidenti i Barcelonës, Laporta ka thënë se askush nuk duhet të sillet me një lojtar që ka dhënë shumë për skuadrën në vitet e kaluara në Camp Nou dhe ai është një akt qyqar.

“Ata i kanë thënë Suarezit përmes telefonit se nuk llogarisin më në të? Duket si një akt qyqar nga presidenti (Bartomeu)”, ka thënë ai.

“Është një mos respekt ndaj lojtarit që ka dhënë shumë për Barcelonën dhe e ka ndihmuar me të gjitha forcat. Është një pamje e keqe për klubin”.

“Koeman duket se nuk i respekton lojtarët që kanë shkruar këtu historinë, kjo mund t’i kushtojë shumë atij në zhveshtore”.

“Ata duket se nuk mund ta bindin as Messin të qëndrojë në skuadër. Sjellje të tilla largojnë lojtarët më të mirë nga klubi”, ka shtuar më tej Laporta.