Kryetari i Partisë më të madhe opozitare në Serbi, Çedomir Jovanoviq ka folur rreth idesë së korigjimit të kufijve mes Kosovës e Serbisë.

Ai vlerësoi Kosovën si “rast i veçantë” dhe shtoi se ideja e ndryshimit të kufijve në Ballkan nuk është përgjithësisht e mirë.

“Në përgjithësi, ndryshimi i kufijve nuk është i mirë. Kjo është një nga parimet e bazës së politikës së sigurisë”, tha Jovanoviq në Podgoricë, transmeton lajmi.net.

Ai ka shtuar se Kosova është një rast i veçantë, dhe se rajoni duhet të jetë aleati më i madh në këtë çështje pasi pasojat për rajonin sigurisht që ekzistojnë.

Sipas tij edhe rajoni duhet ta pranojë se pa një Serbi të qëndrueshme dhe paqësore nuk ka paqe.

“Kur i tërë rajoni ta ketë kuptuar se nuk ka asnjë çështje kombëtare që mund të zgjidhet pa pëlqimin e shteteve të tjera dhe popujve, atëherë ne mund të flasim për Ballkanin evropian”, ka thënë Jovanoviq.

Për deklaratat e presidentit serb Aleksandar Vuçiq për udhëheqjen Sllobodan Millosheviqit, ai tha se dëshiron të qëndroj larg këtyre deklaratave, duke shtuar se tani pjesa më e vështirë është që ta bindin popullin se po duan marrëveshje të paqes si një zgjidhje me Kosovën.