Atlético Madrid po përballet me shqetësime serioze lidhur me të ardhmen e sulmuesit argjentinas Julián Álvarez, mes raportimeve se lojtari po shqyrton mundësinë e largimit gjatë afatit kalimtar veror.

Sipas mediave spanjolle, FC Barcelona e ka vendosur Alvarezin në krye të listës së objektivave për repartin ofensiv, duke e parë si pasues ideal të Robert Lewandowski në projektin e ri sportiv.

Raportet bëjnë të ditur se drejtuesit e Barcelonës kanë pasur kontakte me përfaqësuesit e lojtarit, ndërsa interesim për argjentinasin kanë shfaqur edhe Paris Saint-Germain dhe Arsenal F.C..

Brenda klubit madrilen besohet se Alvarez po kërkon një dalje nga “Metropolitano”, edhe pse deri tani nuk ka pasur ndonjë kërkesë zyrtare nga ana e tij. Megjithatë, Atletico nuk planifikon të lehtësojë largimin e yllit argjentinas dhe kërkon një shumë të konsiderueshme për të hapur negociatat.

Barcelona, në anën tjetër, nuk është e gatshme të paguajë mbi 100 milionë euro për transferimin e sulmuesit, çka e bën marrëveshjen mjaft të komplikuar në këtë fazë.