Shefja e Politikës së Jashtme të Bashkimit Evropian, Kaja Kallas, ka deklaruar se Evropa do të propozojë një listë lëshimesh për Rusinë si pjesë e një zgjidhjeje për t’i dhënë fund luftës në Ukrainë.

Sipas saj, bisedimet për paqen kanë përfshirë kryesisht zyrtarë ukrainas, amerikanë dhe rusë, ndërsa evropianët janë konsultuar herë pas here. Kallas ka theksuar se pa evropianët nuk mund të ketë marrëveshje paqeje.

Ajo ka njoftuar gjithashtu se lista do t’u propozohet qeverive anëtare të BE-së në ditët në vijim.

E pyetur se çfarë mund të përfshijë lista, Kallas ka përmendur kthimin e të gjithë fëmijëve ukrainas të rrëmbyer gjatë luftës dhe kufizimet mbi forcat e armatosura të Rusisë, pa dhënë detaje të tjera.

Zyrtarët evropianë kanë theksuar se pjesë e çdo zgjidhjeje mund të jenë edhe rreth 210 miliardë euro në asete ruse të ngrira në Evropë.