Kancelari i Gjermanisë, Friedrich Merz ka bërë thirrje që Izraeli të tregojë përmbajtje në fushatën e tij në jug të Libanit.

Merz tha se vendi i tij e sheh me shqetësim të madh përshkallëzimin e fundit në jug dhe i bëri thirrje milicisë Hezbollah, e mbështetur nga Irani, që të dorëzojë armët.

Ofensiva tre-mujore në jug të Libanit ka zhvendosur rreth një në pesë libanezë, ose rreth 1.4 milion njerëz, ndërsa të paktën 3,412 persona janë vrarë në sulmet izraelite që nga 2 marsi, sipas Ministrisë së Shëndetësisë së Libanit, raporton skynews.

Shifrat nuk bëjnë dallim mes luftëtarëve dhe civilëve, ndërsa Izraeli pretendon se jep paralajmërime paraprake për të mbrojtur civilët.

Deklaratat e Merz vijnë në një kohë kur janë shfaqur raportime për një telefonatë të tensionuar mes Donald Trump dhe Benjamin Netanyahut lidhur me bombardimet izraelite në Liban, sipas Axios.

Sipas këtyre raportimeve, ekziston një perceptim se Trump po humb durimin me kryeministrin izraelit, pavarësisht se presidenti amerikan tha se kishte një “telefonatë shumë produktive” me Netanyahun dhe i kishte kërkuar që të mos kryente një “sulm të madh” në Bejrut.