Natasha Kandiq, aktiviste e shoqërisë civile dhe njëherit drejtoreshë e Fondit për të Drejtën Humanitare në Serbi, ka komentuar deklaratën e djeshme të drejtorit të ashtuquajturës Zyrë për Kosovën në qeverinë serbe, Petar Petkoviq, ndaj kryeministrit të Kosovës, Albin Kurti.

Kandiq ka thënë se me Petkoviqin nuk është më e sigurt për t’u ulur në tryezën e negociatave, duke iu referuar dialogut Kosovë – Serbi.

“A është normale që një drejtor i zyrës për Kosovën të thotë për kryeministrin e Kosovës se ai është një ‘psikopat dhe i çmendur’? Me të njëjtin zemërim, ai i bën thirrje BE -së të reagojë sepse Policia e Kosovës po sulmon ‘njerëz të paarmatosur’. Me të nuk është më e sigurt të ulesh në tryezën e negociatave”, ka shkruar Kandiq në Twitter.

Pas aksionit të djeshëm të Policisë së Kosovës në veri të vendit, Petkoviqi ka reaguar duke thënë se ky aksion është një provokim i radhës i kryeministrit Kurti, para zgjedhjeve lokale.

Petkoviqi po ashtu ka thënë se për këtë ka lajmëruar edhe emisarin e BE-së për dialogun, Miroslav Lajçak.

Policia e Kosovës ka zhvilluar dje aksion anti-kontrabandë në Pejë, Prishtinë, Mitrovicë të Jugut e edhe atë të Veriut.

Situata më e tensionuar ishte në veri të vendit, pasi protestues serbë shprehën pakënaqësi ndaj aksionit të autoriteteve kosovare.

Zar je normalno da direktor kancelarije za KiM kaže za kosovskog premijera da je "psihopata i ludak". Istim besom poziva EU da reaguje jer kosovska policija bije"goloruki narod". S njim više nije sigurno sesti za pregovarački sto.

— Natasa Kandic (@natasakandic) October 13, 2021