Harry Kane ka vendosur edhe një herë emrin e tij në historinë e futbollit evropian.

Sulmuesi anglez është shpërblyer zyrtarisht me Këpucën e Artë të Evropës, pasi e mbylli sezonin 2025/26 si golashënuesi më i mirë në kontinent.

Kane realizoi 36 gola në 31 ndeshje të Bundesligës, duke qenë një nga figurat kryesore të Bayern Munichut në rrugëtimin drejt titullit kampion në Gjermani.

Për sulmuesin anglez, ky është trofeu i dytë i Këpucës së Artë, pas triumfit të parë në vitin 2024, në sezonin e tij debutues në Bundesligë.

Me këtë sukses, Kane vazhdon të shkruajë historinë. Vetëm Cristiano Ronaldo, me katër trofe, dhe Lionel Messi, me gjashtë, e kanë fituar më shumë herë këtë çmim sesa ai.

Kane e përfundoi sezonin 2025/26 me një diferencë të ndjeshme ndaj rivalëve të tij në garën për Këpucën e Artë, duke konfirmuar edhe një herë statusin e tij si një prej golashënuesve më produktivë dhe më të rrezikshëm në futbollin evropian.

Fituesit e fundit të Këpucës së Artë:
2021/22 – Robert Lewandowski
2022/23 – Erling Haaland
2023/24 – Harry Kane
2024/25 – Kylian Mbappé
2025/26 – Harry Kane

Me këtë triumf, ish-sulmuesi i Tottenhamit bëhet lojtari i parë pas Robert Lewandowskit që e fiton dy herë Këpucën e Artë brenda një periudhe kaq të shkurtër.

Ndërkohë, Bayern Munich vazhdon të ketë në radhët e veta një prej sulmuesve më produktivë të futbollit evropian, me Kane që po e shndërron gjithnjë e më shumë eksperiencën e tij në Gjermani në një kapitull historik të karrierës.