Procesi i nënshkrimit të kontratave/marrëveshjeve me banorët e fshatrave Hade dhe Shipitullë është duke shkuar sipas dinamikës së paraparë dhe sipas procedurave të parapara ligjore, njofton KEK me një komunikatë për media.

Sipas këtij njoftimi, KEK-u ka bërë ndarjen e lagjeve me prioritet dhe se ndarja është bërë në tri zona.

“Zona e parë me prioritet ku edhe gjenden shtëpitë e para në afërsi të mihjes, ka gjithsejtë 99 shtëpi, nga to për 74 paluajtshmëri tashmë janë finalizuar kontratat dhe janë të gatshme për nënshkrim te noteri sapo të kompletohet dokumentacioni i nevojshëm nga ana e banorëve. KEK-u deri më tani i ka finalizuar edhe obligimet financiare për shpronësimin e 14 pronave të banorëve. Po ashtu, edhe 14 kontrata të tjera janë të finalizuara te noteri dhe transaksionet do të përfundojnë sapo të nënshkruhen nga ana e banorëve”, thuhet në njoftim.

“Pavarësisht se procesi është i komplikuar dhe nuk varet vetëm nga puna dhe dinamika e Korporatës, konsiderojmë së është duke shkuar në nivelin e kënaqshëm dhe në një afat rekord po synohet finalizimi i të gjitha kontratave”, thuhet më tej aty.

Korporata edhe një herë i bënë thirrje banorëve që të rregullojnë të gjitha dokumentet dhe siç kërkohet me ligj të paraqiten te Noteri për të përfunduar të gjitha procedurat e shpronësimit.

“Korporata Energjetike e Kosovës, edhe një herë garanton të gjitha palët dhe veçanërisht banorët e këtyre zonave se po zbatohen të gjitha standardet më të larta ndërkombëtare për të përmbyllur procesin e zhvendosjes dhe siç është premtuar në një afat rekord janë duke u përmbush të gjitha obligimet të cilat janë në kompetencë të korporatës”.

Më tej, KEK njofton qytetarët se Korporata tashmë është stabilizuar në tërësi dhe po operon me të gjitha njësitë gjeneruese për të furnizuar qytetarët me energji elektrike.