Ambasadorja e SHBA në Tiranë, Yuri Kim, ka thënë përmes një video-mesazhi në Facebook, se ky 4 korrik do të jetë ndryshe nga të tjerët.

Kim u shpreh se ndonëse duhet të qëndrojnë të distancuar fizikisht, amerikanët dhe shqiptarët janë po aq afër dhe të bashkuar si gjithmonë.

”Festimi i ditës së pavarësisë së Amerikës këtë vit nuk është si asnjë tjetër. Për herë të parë, po përballemi me një pandemi e cila nuk na ka lënë të mblidhemi nën një çati, për të festuar ditëlindjen e 244-t ”, thuhet në mesazhin e ambasadores Kim.

E Presidenti Ilir Meta, i ka shkruar një letër urimi Presidentit të SHBA-së, Donald Trump, me rastin e “4 Korrikut”, festës së Pavarësisë.

Në mesazhin e tij Meta shkruan së ky përvjetor mbërrin në një kohë shumë të vështirë për Shtetet e Bashkuara të Amerikës si dhe për mbarë botën, pasi pandemia e COVID-19 është përhapur në të gjithë rruzullin me efektet e saj serioze dhe të paparashikueshme por se SHBA-të do t’ia dalin të mbizotërojnë kundër kësaj pandemie dhe se do të ngrihen edhe më të fortë se kurrë.