Gjykimi në mungesë për krime lufte të kryera nga forcat serbe në Kosovë, bazuar në Kodin aktual të Procedurës Penale po shihet gati i pamundur nga ministri i Drejtësisë, Selim Selimi.

Kreu i MD-së në një intervistë për Ekonomia Online deklaroi se ka kërkuar që të kthehet Kodi i Procedurës Penale në Qeveri, pas dy rekomandimeve që ka pasur nga komisioni i Venecias.

Ai tha se i tillë çfarë është Kodi i Procedurës Penale ka disa pengesa që nuk mund të ndiqen kriminelët që fshihen në Serbi.

“Kam kërkuar që të kthehet Kodi i Procedurës Penale në Qeveri për shkak që kemi pasur dy rekomandime të komisioneve të Venecias dhe kam insistuar që neni i gjykimit në mungesë të kombinohet me ligjin ekzistues që ka bërë Kuvendi i cili ka barriera dhe disa pengesa përbrenda tij. Kam takuar Prokurorinë Speciale dhe departamentin që merret me krime lufte”.

“Ata i kanë dhënë sugjerimet e tyre dhe gjithashtu e kam formuar një grup i cili prej sot ka filluar të punojë, siç janë ShBA-ja që do të jenë pjesë e diskutimit, Ministria e Drejtësisë dhe do të diskutojmë mënyrat më të mira se cilat janë barrierat e ndjekjes së gjykimit në mungesë. I tillë çfarë është ka disa pengesa që nuk mund t’i ndjekim kriminelët që fshihen në Serbi”, shtoi Selimi.

Selimi ka thënë se do të hapet rruga që Kosova të bëjë një ligj të veçantë, ku do t’i mundësojë unionin civil mes gjinive të njëjta.

“Ne kemi përcjellë Kodin Civil, që është një gjë e re e cila ka kaluar një hap . Mundësohet që në shtetet që i kemi në rajon e që janë më përpara në integrim evropian që të mundësohet një ligj i vecantë për unionin civil. Është ruajtur tradicionalja ajo që ka qenë më herët”.

“Por hapet rruga që Kosova të bëjë një ligj të veçantë që do të mundësojë unionin civil mes gjinive të njëjta. Pra në momentin kur Kodi Civil shkon në Kuvend dhe me shpresë votohet, ne do fillojmë menjëherë punën e ligjit të veçantë”, shtoi ai.

Selimi ka thënë se çështja e vettingut është diskutuar gjerë e gjatë dhe ka pasur mendime të ndryshme se ministri nuk është pro këtij procesi.

Selimi, theksoi se komisioni i kaluar ka pasur ekspertë të jashtëzakonshëm dhe juristët më të mirë në Kosovë, por mekanizmin i tillë ka qenë politik dhe i njëanshëm.

“Çështja e venttingut është diskutuar gjerë e gjatë dhe ka pasur mendime të ndryshme nga ai që Ministri nuk po do vettingut. Çfarëdo sistemi të dizajnojmë të vettingut është më e rëndësishmja që të gjithë hisedarët e drejtësisë të ulen në një tavolinë”.

I pari i Drejtësisë, ka bërë me dije se ka marrë mbështetje edhe nga institucionet e drejtësisë si Këshilli Prokurorial dhe Këshilli Gjyqësor që të jenë pjesë e një sistemi gjithëpërfshirës, raporton EO.

“Andaj unë i kam ftuar Këshillin Prokurorial dhe Këshillin Gjyqësor, prokurorinë, Gjykatat, Policinë dhe së bashku duhet të dalin me shembuj dhe propozime konkrete”.

“Komisioni i kaluar ka pasur ekspertë të jashtëzakonshëm dhe ka juristët më të mirë në Kosovë  por mekanizmin e tillë e kam konsideruar politik pasi që ka qenë i njëanshëm i bërë nga ministrja pa i kyç të gjithë hisedarët. Andaj e kam takuar komisionin e kaluar dhe e kam shprehur këtë vizion dhe i kam lutur që ata të jenë prapë pjesë e këtij komisioni të ri që do të jetë gjithëpërfshirës”.

“Nga mediet kam kuptuar qa ata kanë dhënë dorëheqje. Pasi që i kanë parë termat e referencës që nuk ndryshojnë nga komisioni i kaluar, por përbërja e këtij grupi do të ndryshojë. Nga korrektësia ende e kam lënë të hapur mundësinë që ata të kthehen në këtë grup gjithëpërfshirës”.