Trajneri i Barcelonës, Ronald Koeman është i bindur se ekipi i tij mund ta fitojë titullin në La Liga këtë sezon, nëse arrin t’i fitojë të pesë ndeshjet e mbetura.

Barcelonës iu dha një goditje të enjten në shpresat e tyre për titullin në La Liga pasi pësoi një humbje tronditëse 2-1 kundër Granadan.

Megjithatë, trajneri holandez Koeman është ende optimist se ekipi i tij mund të stolistet me trofeun e më të mirit në këtë sezon.

Koeman mendon se fitimi i pesë ndeshjeve të fundit në ligë do të jetë i mjaftueshëm për t’i parë ata duke fituar titullin në fund të sezonit në La Liga.

“Unë jam i bindur që nëse i fitojmë të pesë ndeshjet ne do të jemi kampionë”, ka thënë fillimisht Koeman në konferencën e tij para ndeshjes së tyre në Valencia.

“Humbja ndaj Granadës ishte një zhgënjim sepse ishte një mundësi e humbur, por nuk ka kohë për t’u trishtuar”.

“Ne jemi akoma në luftë për të fituar La Liga. Ka gjëra për të përmirësuar, ne kemi folur dhe mendoj se ekipi është i përgatitur mirë”, përfundoi holandezi.