Kryetari i Partisë Demokratike të Kosovës (PDK) Memli Krasniqi të hënën ka mbledhur Këshillin drejtues të partisë për të diskutuar për situatën në veri të vendit, raporton Ekonomia Online.

Kryetari i PDK-së ka thënë se qytetarët kanë nevojë për qartësi. Ai tha tutje se Kurti po e vendos Kosovën në hartën e vendeve të sanksionuara.

“Kam ftuar mbledhjen e Këshillit Drejtues të PDK-së, për të diskutuar për gjendjen e rëndë në vend dhe për rrugën që është para nesh. Mbi të gjitha, për vendimet dhe veprimet që i kërkon kjo periudhë sfiduese”.

“Situata nuk është normale dhe nuk mund ta simulojmë normalitetin. Qytetarët kanë nevojë për qartësi në këtë kohë konfuzioni. Dhe një gjë është më se e qartë: Kosova nuk mund të mbetet edhe më tutje peng e tekeve të Albin Kurtit”, ka shkruar Krasniqi në Facebook.

“Ky kryeministër i papërgjegjshëm po e vendosë Kosovën në hartën e vendeve të sanksionuara ku, nga Evropa, bëjnë pjesë vetëm Rusia, Bjellorusia, Moldavia e Republika Srpska”, ka deklaruar Krasniqi.