Presidenti i Komitetit Ndërkombëtar të Kryqit të Kuq, Peter Maurer, ka raportuar se janë regjistruar 208 sulme të lidhura me koronavirusin ndaj punëtorëve shëndetësorë në 13 shtete të botës nga muaji mars.

Maurer ka thënë më 27 maj se punëtorët shëndetësorë janë duke u sulmuar dhe abuzuar, derisa sistemet shëndetësore janë duke u shënjestruar në kohën kur nevojiten më së shumti.

Këto sulme përbëjnë dallim të madh me qasjen e shumë kombeve ndaj punëtorëve shëndetësorë, nëpër të cilat personat e vijës së parë të frontit kundër virusit janë respektuar, duartrokitur dhe përgëzuar.

“Kriza me Covid-19 po rrezikon të kthehet në krizë të mbrojtjes”, ka thënë Maurer para Këshillit të Sigurimit të Kombeve të Bashkuara.

Ai u ka thënë gazetarëve se të dhënat e mbledhura nga ky Komitet në 13 shtete në Lindje të Mesme, kontinentin amerikan dhe Afrikë, tregojnë se “shifrat aktuale janë shumë më të mëdha sesa është parashikuar”.

Incidentet dallojnë nga kërcënimet verbale, e deri të djegia e objekteve që kanë strehuar pacientë të prekur nga sëmundja Covid-19, që shkakton koronavirusi.

Komiteti Ndërkombëtar i Kryqit të Kuq bashkë me një varg organizatash ndërkombëtare, infermierë dhe profesionistë të kujdesit shëndetësor kanë nisur një deklaratë duke përgëzuar përgjigjjen e publikut ndaj atyre që po ndihmojnë në luftimin e koronavirusit.

Megjithatë ata kanë theksuar se “fatkeqësisht, realiteti i trishtë është se punëtorët shëndetësorë kanë qenë subjekt i forcave shokuese të dhunës për një kohë të gjatë”.