Më 17 qershor 2018 në Rostov-on-Don, Brazili e Zvicra po e luanin ndeshjen e tyre të parë në Botërorin e futbollit që po mbahej në Rusi.

Sytë e tifozëve të futbollit ishin të drejtuar nga dhjetëshja e Brazilit – superylli Neymar. Te Zvicra njëmbëdhjetëshen në shpinë e mbante Valon Behrami.

Detyra për Behramin ishte e qartë – të mos i ndahej Neymarit dhe të mundohej të ndalte atë. Dhe Behrami u vlerësua se e arriti këtë me shumë sukses, shkruan sot “Koha Ditore”. Neymar shumë herë mbeti i shtrirë në tokë pas dueleve të forta me lojtarët e Zvicrës, por edhe aksionet në të cilat mbeti në këmbë, i humbi nga Behrami. Shumicën prej tyre.

Behrami befasisht u zëvendësua në mesin e pjesës së dytë, ndërsa ajo është vlerësuar prej paraqitjeve më të mira të tij te Zvicra.

Zvicra si vend vlerësohet se i ka dhënë shumë Behramit. Por edhe futbollisti 34-vjeçar vlerësohet se i ka dhënë shumë futbollit zviceran. Ndalja e Neymarit në një ndeshje në Botëror është prej kontributeve të tij.