Kryeministri në detyrë i Republikës së Kosovës, Albin Kurti, ka marrë pjesë sot në punëtorinë njëditore të organizuar nga Inspektorati i Arsimit me temën “Praktikat e mira për inspektim efektiv”, ku ka theksuar rëndësinë që Qeveria i jep arsimit dhe forcimit të kapaciteteve institucionale në këtë fushë, raporton Ekonomia Online.

Në fjalën e tij para inspektorëve të arsimit, Kurti ka vlerësuar përpjekjet dhe angazhimin e tyre, duke rikujtuar sfidat me të cilat është përballur ky institucion ndër vite. Ai tha se për një periudhë të gjatë, Inspektorati ka funksionuar me vetëm 25 inspektorë, një numër që, sipas tij, nuk përkon me nevojat reale të sistemit arsimor në vend.

“Jemi këtu së bashku, për të vlerësuar përpjekjet tona për ngritjen e cilësisë në arsim, edhe për të rikonfirmuar që arsimimi dhe edukimi i brezave të rinj është prioritet qeveritar e shtetëror i yni. Kujtojmë, se për një periudhë të gjatë kohore, Inspektorati i Arsimit ka funksionuar me vetëm 25 inspektorë. Një numër që nuk përkon as afër me numrin e institucioneve arsimore, kopshteve e çerdheve, pra nuk përkon me rëndësinë dhe barrën që ka ky institucion. Megjithëkëtë, edhe përballë këtij realiteti sfidues, me përkushtim, ju keni mbajtur funksionimin e një prej mekanizmave më të rëndësishëm të sistemit arsimor. E për këtë, ju shpreh vlerësimin dhe mirënjohjen time, të gjithëve, secilës e secilit., theksoi Kurti.

Ai tha se si rezultat i angazhimit të Qeverisë dhe Ministrisë së Arsimit, janë shtuar 22 inspektorë të rinj, të cilët do të forcojnë më tej praninë dhe mbështetjen në terren për institucionet arsimore në vend.

“Përpjekjet e Qeverisë sonë dhe të Ministrisë së Arsimit, Shkencës, Teknologjisë dhe Inovacionit për forcimin e kapaciteteve të inspektoratit arsimor nuk janë ndalur asnjëherë. Si rezultat i këtij angazhimi, kemi pranuar 22 inspektorë të rinj që do t’i japin sistemit tonë arsimor më shumë mbështetje dhe prani në terren”, deklaroi Kryeministri në detyrë.

Ai shtoi se investimet në arsim kanë qenë të vazhdueshme dhe të orientuara drejt përmirësimit të kushteve për mësimdhënie dhe mësimnxënie: nga ndërtimi dhe renovimi i shkollave me infrastrukturë moderne, pajisje bashkëkohore, e deri te zhvillimi profesional i mësimdhënësve.

“Të gjitha këto investime janë edhe në favor të punës suaj si Inspektorat i Arsimit. Sa më i fortë të jetë themeli i sistemit arsimor, aq më e lehtë bëhet puna e inspektimit dhe aq më pak ndërhyrje do të jenë të nevojshme”.

Fjala e plotë e kryeministrit Kurti:

E nderuar ministre në detyrë, znj. Arbërie Nagavci,

Të nderuar znj. Besa Bytyçi-Baraliu, drejtore e përgjithshme e Inspektoratit të Arsimit,

Të nderuar inspektorë dhe inspektore të arsimit,

Është kënaqësi të jem sot këtu me ju, me profesionistë që mbikëqyrin cilësinë e arsimit tonë, që ruajnë standardin dhe ndihmojnë përmirësimin e mëtejmë. Jemi këtu së bashku, për të vlerësuar përpjekjet tona për ngritjen e cilësisë në arsim, edhe për të rikonfirmuar që arsimimi dhe edukimi i brezave të rinj është prioritet qeveritar e shtetëror i yni.

Kujtojmë, se për një periudhë të gjatë kohore, Inspektorati i Arsimit ka funksionuar me vetëm 25 inspektorë. Një numër që nuk përkon as afër me numrin e institucioneve arsimore, kopshteve e çerdheve, pra nuk përkon me rëndësinë dhe barrën që ka ky institucion. Megjithëkëtë, edhe përballë këtij realiteti sfidues, me përkushtim, ju keni mbajtur funksionimin e një prej mekanizmave më të rëndësishëm të sistemit arsimor. E për këtë, ju shpreh vlerësimin dhe mirënjohjen time, të gjithëve, secilës e secilit.

Përpjekjet e Qeverisë sonë dhe të Ministrisë së Arsimit, Shkencës, Teknologjisë dhe Inovacionit për forcimin e kapaciteteve të inspektoratit arsimor nuk janë ndalur asnjëherë. Si rezultat i këtij angazhimi, kemi pranuar 22 inspektorë të rinj që do t’i japin sistemit tonë arsimor më shumë mbështetje dhe prani në terren.

Gjatë këtyre viteve kemi investuar në mënyrë të vazhdueshme dhe strategjike në sektorin e arsimit, në ndërtimin dhe renovimin e shkollave dhe çerdheve, në pajisjen e tyre me infrastrukturë moderne, dhe në zhvillimin profesional të mësimdhënësve. Kemi krijuar kushte më të mira, që shkollat të ofrojnë cilësi, përgatitje të lartë dhe mirëqenie për çdo nxënës.

Të gjitha këto investime janë edhe në favor të punës suaj si Inspektorat i Arsimit. Sa më i fortë të jetë themeli i sistemit arsimor, aq më e lehtë bëhet puna e inspektimit dhe aq më pak ndërhyrje do të jenë të nevojshme.

Kur standardet ngrihen dhe kushtet përmirësohen, kontrolli shndërrohet në partneritet dhe mbikëqyrja bëhet garanci si për cilësi ashtu edhe për efikasitet. Kur themeli është i fortë, ndërtesa qëndron vetë.

Roli i Inspektoratit natyrisht nuk është të ndëshkojë, por të udhëzojë, të këshillojë dhe t’i përkrahë institucionet arsimore në rrugën e përmirësimit të vazhdueshëm e të pandalshëm. Qëllimi juaj nuk është të krijoni frikë, por të siguroni standarde dhe të nxisni përparim. Ju jeni bashkëpunëtorë të mësimdhënësve dhe aleatë të drejtuesve të shkollave, jeni bashkudhëtarë në rrugëtimin për cilësi dhe efikasitet.

E dimë mirë se inspektimi nuk është detyrë e lehtë. Kërkon profesionalizëm, ndershmëri dhe përgjegjësi. Por, në këtë mision fisnik, ju nuk jeni vetëm. Qeveria do të vazhdojë të mbështesë me trajnime cilësore, me përmirësim të kushteve të punës dhe me vlerësimin që e meritoni. Sistemi arsimor dhe përparimi në arsim varet shumë prej institucionit tuaj që ju e përbëni. Sikur cilësia e mësimnxënies ashtu edhe efikasiteti i mësimdhënies varen në masë të konsiderueshme prej punës dhe prej angazhimit tuaj. Por, do të shkojë edhe një hap më tej. Kureshtja për dijen, pasioni për shkencat dhe artet, lulëzimi i këtyre, po ashtu varet nga puna juaj, nga puna jonë e përbashkët.

Andaj të dashur inspektorë,

Puna juaj e dimë që është shpesh e heshtur, por ndikimi i saj ndihet në çdo klasë, dhe në çdo shkollë të vendit. Për punën tuaj do të flasin brezat që do ta vijnë. Qeveria është, dhe do të mbetet përherë në krahun tuaj, duke ecur bashkë në këtë rrugëtim për arsim më të drejtë, më të mirë, më cilësor e edhe më njerëzor. Së bashku do të vazhdojmë punën për shkolla më të forta dhe për të ardhme më të ndritur për fëmijët e Republikës së Kosovës.

Faleminderit shumë për kontributin tuaj të çmuar, për përkushtimin ndaj gjeneratave të reja dhe për besimin tuaj në misionin fisnik të arsimit.