Kryeministri i vendit dhe kryetari i Lëvizjes Vetëvendosje, Albin Kurti, në mbledhjen e 50-të të Këshillit të Përgjithshëm të kësaj partie ka përmendur Adem Demaçin e Astrit Deharin, ku për këtë të fundit kërkoi drejtësi.

Kurti tha se ish-aktivisti i VV-së, Astrit Dehari, është viktimë e padrejtësisë kriminale në burgjet e Kosovës së pavarur, ndërsa Demaçin e cilësoi si vigan të rezistencës shqiptare në burgjet jugosllave e serbe.

“Sot është data 25 shkurt, e nesër është 26 shkurt. Është ditëlindja e dy personave të veçantë për të gjithë ne. Janë dy persona me shumë vite dallim për të gjithë ne, me histori jetësore, me kontribute shumë të ndryshëm, por që koincidojnë ta kenë dhe ditëlindjen në të njëjtën ditë, por edhe inicialet e njëjta, A.D. E kam fjalën për tribunin dhe viganin e rezistencës shqiptare në burgjet jugosllave e serbe, Adem Demaçin dhe për shokun e aktivistin tonë të dashur, Astrit Deharin, viktimë e padrejtësisë kriminale në burgjet e Kosovës së pavarur”, ka thënë Kurti.

Sipas tij, të dy janë busulla të LVV-së, dhe siç u shpreh ai “për sa kohë që të jetoj kujtimi i tyre në zemrat tona, për aq kohë do të jehojë edhe Lëvizja”.

Kreu i ekzekutivit të vendit kërkoi drejtësi për rastin Dehari, ndërsa tha se është viktimë e padrejtësisë kriminale në burgjet e Kosovës së pavarur.

“Nuk e humbim rrugën për sa kohë që rruga jonë ndriçohet nga pishtarë si ata. Lavdi dhe nderim për udhërrëfyesin kombëtar, Adem Demaçin, kujtim dhe drejtësi, me çdo kusht e deri në fund për shokun tonë, Astrit Deharin”, ka thënë Kurti.