Kryeministri i vendit, Albin Kurti, në takim me kryetarët e komunave u ka kërkuar atyre që të rrisin shërbimet ndaj qytetarëve.

Madje ai u kërkoi kryetarëve që të jenë të kujdesshëm dhe transparent me shpenzimin e buxhetit komunal.

Ai ka thënë se gjatë vitit 2022 Qeveria ka përmirësuar dukshëm imazhin e vendit duke bërë kështu që Kosova të fillojë të çlirohet nga korrupsioni.

Kurti, deklaroi se është i hapur dhe i gatshëm që të jetë afër gjithë kryetarëve për të mirën ekonomike, sociale dhe mirëqenien e qytetarëve të Kosovës.

“Për nivelin komunal ka një rritje të buxhetit prej 100 milionë eurove krahasuar me vitin paraprak. Kjo duhet të reflektojë edhe në rritjen e shërbimeve komunale karshi qytetarëve tanë, mirëqenies, shëndetësisë, sportit, rinisë e kulturës dhe zhvillimit socio-ekonomik”.

“Jam shumë i interesuar që në takim të tilla të kemi në agjendë çështje që prekin mirëqenien e qytetarëve, por kemi sfida. Me buxhetin duhet të lehtësojmë jetën dhe mirëqenien e qytetarëve e për këtë duhet të punojmë bashkërisht. Si kryeministër i Kosovës jam i gatshëm dhe i hapur të jem afër jush me bashkëpunëtorët e mi por edhe me gjithë kabinetin qeveritarë për tu angazhuar për progresin ekonomik, social të Republikës”.

“Duhet fokusuar që shpenzimi i këtij buxheti të jetë i hapur, transparent dhe llogaridhënës ndaj qytetarit. Bashkë me ministrat kemi prezantuar buxhetin. Do të kemi rast të diskutojmë gjatë takimit, por edhe ju si komuna duhet ta shihni mundësinë se si mund të ndihmoni më tej në planin afatgjatë”, tha Kurti.

Pas fjalës së Kurtit takimi është mbyllur për medie për t’i lënë vend diskutimit të kryetarëve me qeveritarë.

Në takim kanë marr pjesë edhe ministri i Administrimit të Pushtetit Lokal, Elbert Krasniqi, ministri i Financave, Punës dhe Transfereve, Hekuran Murati, si dhe ministrja e Ekonomisë, Artane Rizvanolli.

Fjala e plotë e Kryeministrit Kurti:

Të nderuar kryetarë e nënkryetarë të komunave të Kosovës,

I nderuari Ministër i Administrimit të Pushtetit Lokal, z. Elbert Krasniqi,

I nderuari Ministër i Financave, Punës dhe Transfereve, z. Hekuran Murati,

E nderuara Ministre e Ekonomisë, znj. Artane Rizvanolli,

Të nderuar të pranishëm,

Më lejoni të ju falënderoj për pjesëmarrje në këtë tryezë, të ftuar me qëllim të thellimit të bashkëpunimit dhe zgjerimit të mëtutjeshëm të komunikimit tonë si Qeveri e Republikës së Kosovës me  komunat e Kosovës anembanë. Kjo është hera e tretë, që ne po takohemi në këtë format të takimit brenda pak muajve. Pra, kemi arritur të kemi takime të përbashkëta periodike, duke vlerësuar gjithmonë rëndësinë e bashkërendimit ndërinstitucional. Për të pasur Republikë të përparuar e me mirëqenie, të tilla duhet të jenë edhe komunat e shtetit tonë.

Buxheti i Republikës së Kosovës për vitin 2023 do të jetë mbi 3.2 miliardë euro dhe është buxheti më i lartë ndonjëherë në Kosovën e pavarur. Për nivelin komunal ka një rritje të buxhetit prej 100 milionë eurove krahasuar me vitin paraprak. Kjo duhet të reflektojë edhe në rritjen e cilësisë së shërbimeve komunale karshi qytetarëve tanë, mirëqenies së tyre, edukimit, shëndetësisë, sportit, rinisë e kulturës dhe zhvillimit socio-ekonomik. Gjithashtu, duhet fokusuar që shpenzimi i këtij buxheti të jetë i hapur, transparent dhe llogaridhënës ndaj qytetarëve. Në këtë drejtim, unë, së bashku me ministrat, kemi realizuar një seri takimesh me qytetarë për t’ua prezantuar buxhetin në komunat, që e kemi vizituar.

Për vitin 2023, i kemi shtuar 240 pozita të reja për inspektoratet. Pra, që të kemi më shumë inspektorë, që të mbrohen të drejtat e punëtorëve, që të sigurohet cilësia e shërbimeve; mbrojtja e konsumatorit; dhe mbledhja e tatimeve, që mundëson ofrimin e shërbimeve më të mira publike.

Krahas sfidës së madhe për shëndetin publik, pandemisë Covid-19, e cila ndikoi në masë të madhe në ekonomi, vitin e kaluar e kishim edhe krizën e energjisë. Andaj disbursuam 95 milionë euro për të ndihmuar qytetarët e bizneset në përballje me këtë krizë. Po ashtu, i ndamë 6 milionë euro për 10 mijë familje për të subvencionuar pajisjet, që do të ulin rreth 70% konsumin e energjisë. E kemi investuar në efiçiencë të energjisë në ndërtesat publike në 7 komuna, ku janë investuar rreth 4 milionë euro dhe është arritur kursimi i energjisë në vlerë prej 11 milionë kilovat orë në vit.

Do të kemi rast që ta diskutojmë më në detaje gjatë takimit, mirëpo edhe ju si komuna duhet ta shihni mundësitë se si mund të ndihmoni më tej në planin afatgjatë. 

Me qëllim mbështetjen dhe nxitjen e prodhimit vendor në sektorin e bujqësisë, vitin e kaluar patëm ndarë mbi 70 milionë euro për mbi 28 mijë fermerë. Kjo përbën përkrahjen më të madhe ndonjëherë nga qeveria për bujqit dhe për fermerët. Përmes investimeve kapitale kemi mundësuar rehabilitimin dhe ndërtimin e sistemit të ujitjes për 7,750 hektarë tokë bujqësore në vlerë prej 4.1 milionë euro për 8 komuna. Për vitin 2023, buxheti për bujqit dhe fermerët e kap shifrën 87 milionë euro. Bashkë me mbështetjen nga fondet e jashtme, presim që ta tejkalojë vlerën prej 100 milionë euro. Javën e kaluar, së bashku me Ministrin Faton Peci kemi shpalosur Programin për Pagesa Direkte – 2023, që do të kontribuojë në sektorin e bujqësisë dhe forcimin ekonomik të bujqve tanë.

Këtë vit Kosova u ngrit për 17 vende në Transparency International për luftën kundër korrupsionit. Pra, në vitin, në të cilin lamë pas, kemi përmirësuar dukshëm imazhin e vendit tonë dhe e kemi përmbyllur vitin me aplikimin zyrtar për anëtarësim në Bashkim Evropian. Kosova ka filluar të çlirohet nga korrupsioni, si dhe në këtë mënyrë ta shtojë bashkëpunimin me organizatat e organizmat ndërkombëtarë

Të nderuar të pranishëm,

Jemi angazhuar për digjitalizim dhe që shërbimet e digjitalizuara të avancohen. Agjencia e Shoqërisë së Informacionit, AShI-ja, përmes Platformës eKosova, e cila është platforma qendrore për ofrimin e shërbimeve të digjitalizuar, ka arritur që deri tani të ofrojë rreth 130 shërbime elektronike. Përkushtimi ynë në lehtësimin e shërbimeve për qytetarët ka bërë që në indeksin e Bankës Botërore të ngritemi nga grupi C në grupin B sa i përket fokusit në qeverisje digjitale. Digjitalizimi i shërbimeve dhe procedurave administrative komunale do të ndikojë në rritje të efikasitetit të shërbimeve, si dhe transparencë të institucioneve.

Të nderuar të pranishëm,

Jam shumë i interesuar që sot, e çdo ditë, e në çdo takim të këtillë, t’i kemi në agjendë këto çështje, që prekin drejtpërdrejtë jetën dhe mirëqenien e qytetarëve. Ka edhe shumë projekte e nisma tjera të përbashkëta, por ka edhe shumë sfida. Andaj, bashkërisht, do të duhej që përmes ekzekutimit të mirëfilltë të buxhetit 2023, ta lehtësojmë jetën e qytetarëve e ta zhvillojmë ekonominë e komunës e të vendit. Qasja jonë si Qeveri, është që të jemi afër qytetarëve edhe duke qenë afër komunave, e për këtë na nevojitet intensifikim i bashkëpunimit mes institucioneve tona.

Si Kryeministër i Republikës së Kosovës jam i hapur e i gatshëm të jem afër jush, me bashkëpunëtorët e mi që janë këtu sot, por edhe me gjithë kabinetin qeveritar, për ‘u angazhuar bashkërisht për progresin demokratik, ekonomik e social të Republikës.

Ju faleminderit shumë për pjesëmarrjen, për kontributin e rolin tuaj dhe e mirëpres po ashtu pjesëmarrjen e kontributin edhe në diskutimet gjatë ditës së sotme në këtë tryezë të tretë.

Tash po ia kaloj fjalën Ministrit të Administrimit të Pushtetit Lokal, z. Elbert Krasniqit, në mënyrë që më pastaj të vazhdojmë me diskutime.