Kryeministri i Kosovës, Albin Kurti, ka thënë se marrëdhëniet mes Kosovës dhe Mbretërisë së Bashkuar duhet të thellohen edhe më tej në aspektin ekonomik dhe afarist, raporton Ekonomia Online.

Kurti këto deklarata i bëri në Forumin e Biznesit të Mbretërisë së Bashkuar në Kosovë 2026, të organizuar nga Këshilli i Investitorëve Evropianë, në bashkëpunim me Ambasadën Britanike në Prishtinë.

Ai tha se, përveç marrëdhënieve diplomatike dhe bashkëpunimit në fushën e sigurisë, janë lidhjet ekonomike ato që mund të krijojnë marrëdhënie të qëndrueshme mes dy vendeve dhe popujve.

“Ndërsa miqësia jonë e kahershme dhe marrëdhëniet diplomatike i kanë afruar dy vendet tona, janë lidhjet ekonomike ato që do të krijojnë lidhje të qëndrueshme mes popujve tanë. Bizneset bëjnë diçka që qeveritë e vetme nuk mund ta bëjnë. Ato krijojnë mundësi konkrete për njerëzit, duke hapur vende pune, tregje të reja dhe duke mundësuar që idetë të kapërcejnë kufijtë.”

Kurti ka përmendur edhe kontributin e Mbretërisë së Bashkuar në Kosovë, veçanërisht pas luftës së vitit 1999, duke theksuar rolin e trupave britanike në kuadër të KFOR-it.

“Kosova dhe Mbretëria e Bashkuar kanë ndërtuar një aleancë të fortë dhe të qëndrueshme që nga viti 1999. Pas shpalljes së pavarësisë së Kosovës në vitin 2008, Mbretëria e Bashkuar ishte ndër vendet e para që e njohu Kosovën si shtet sovran dhe të pavarur dhe vendosi marrëdhënie diplomatike me të. Përkushtimi i Mbretërisë së Bashkuar ndaj Kosovës dëshmohet gjithashtu përmes kontributit në KFOR dhe mbështetjes së saj për sigurinë dhe paqen tonë.”

Duke folur për zhvillimet ekonomike në Kosovë, Kurti tha se vendi ka shënuar rritje në vitet e fundit, duke veçuar rritjen e fitimeve të korporatave, themelimin e bizneseve të reja dhe rritjen e investimeve të huaja.

“Rritja ekonomike e Kosovës në tremujorin e parë të këtij viti ishte 5.4 për qind e PBB-së, ndërsa në tremujorin e dytë ishte 4.1 për qind, niveli më i lartë i rritjes në rajonin tonë. Gjatë pesë viteve të fundit, fitimet e korporatave në Kosovë janë rritur me 150 për qind. Gjatë së njëjtës periudhë, numri i bizneseve të reja të themeluara është rritur me 26 për qind, ndërsa numri i bizneseve të reja me pronësi të huaj është rritur me 55 për qind.”

Kryeministri tha se synimi i Kosovës është që të ndërtojë mbi bazën e bashkëpunimit ekzistues me Mbretërinë e Bashkuar, duke zgjeruar tregtinë dhe investimet.

“Duke parë përpara, duam të ndërtojmë mbi këtë bazë të qëndrueshme, duke thelluar marrëdhëniet tona ekonomike dhe afariste, duke zgjeruar tregtinë dhe investimet dhe duke krijuar mundësi të reja që bizneset dhe sipërmarrësit tanë të punojnë së bashku. Kosova ka shumë për të mësuar nga tradita e gjatë e Mbretërisë së Bashkuar në transformimin ekonomik, ndërsa njëkohësisht sjell në këtë partneritet talentin dhe ambicien e saj.”

Drejtori ekzekutiv i Këshillit të Investitorëve Evropianë, Emrush Ujkani, ka thënë se organizimi i Forumit të Biznesit të Mbretërisë së Bashkuar në Kosovë 2026 është rezultat i një pune disa-mujore në bashkëpunim me Ambasadën Britanike në Prishtinë.

Ujkani tha se synimi është që marrëdhëniet mes Kosovës dhe Mbretërisë së Bashkuar të marrin një përmbajtje më të madhe ekonomike dhe që bashkëpunimi mes institucioneve dhe sektorit privat të shndërrohet në mundësi konkrete.

“Së bashku me Ambasadën Britanike në Prishtinë kemi punuar për muaj të tërë, pothuajse 10 muaj, në përgatitjen e këtij forumi. Sigurisht, nuk ka qenë një proces i lehtë, por ia dolëm. Në emër të Këshillit të Investitorëve Evropianë, ju uroj mirëseardhjen në Forumin e Biznesit të Mbretërisë së Bashkuar në Kosovë 2026. Shprehim mirënjohjen tonë për Ambasadën Britanike për mbështetjen e saj institucionale, si dhe për kompanitë dhe partnerët që na janë bashkuar sot. Prania juaj pasqyron interesin e përbashkët për t’i dhënë një përmbajtje më të madhe ekonomike marrëdhënieve mes dy vendeve tona”, tha ai.

Ai theksoi se partneritetet ekonomike kërkojnë besim, rregulla të qëndrueshme dhe institucione që mund të garantojnë zbatimin e tyre.

“Partneritetet ekonomike zhvillohen kur bizneset mund të identifikojnë një mundësi të besueshme dhe të kuptojnë kushtet në të cilat do ta ndjekin atë. Investimet kërkojnë besim në qëndrueshmërinë e rregullave, në institucionet që i zbatojnë ato dhe në aftësinë e partnerëve për t’i përmbushur zotimet e tyre. Për një vend që synon zhvillim të qëndrueshëm, këto konsiderata janë thelbësore. Kapitali mund të financojë projekte, por cilësia e qeverisjes dhe zbatimit përcakton nëse ai projekt mund të krijojë vlerë afatgjatë”, tha Ujkani.