Kryeministri Albin Kurti ka thirrur një konferencë të jashtëzakonshme për shtyp pas shpërthimit në kanalin e Ibër-Lepencit në Zubin Potok.

Ai ka thënë se ky është një sulm terrorist që beson se vjen nga Serbia.

Kurti tha se nlse nuk sanohet shpejt dëmi, një pjesë e Kosovës rrezikon të mbetet pa rrymë dhe ujë

Kurti bëri të ditur se Policia tashmë ka arritur në vendin e ngjarjes dhe ka marrë në dorë situatën. “Ky është një sulm kriminal dhe terrorist”, tha Kurti, duke e dënuar ashpër aktin dhe duke e cilësuar si një sulm të planifikuar dhe të realizuar nga individë të trajnuar.

Ai theksoi se ky sulm është një episod tjetër i një serie sulmesh të ngjashme, që kanë për synim destabilizimin e rendit dhe sigurisë.

Sipas kryeministrit dhe liderit të Vetëvendosjes, sulmi ka ndodhur për shkak të suksesit të qeverisjes së tij?!

“Arsyeja pse Republika e Kosova duhet të përballet me këto sulme tash është pikërisht suksesi i Republikës së Kosovës. Suksesi ynë është duke i çmendur ata, dhe ata janë gjithnjë e më agresiv sepse janë gjithnjë e më nevrik. Po të dështonte shteti i Kosovës nuk do të na i bënin këto. Këto po na i bënë pse jemi të sukesshëm”, deklaroi Kurti.

Kryeministri i bëri thirrje qytetarëve që të ruajnë qetësinë dhe të besojnë në institucionet e rendit, të cilat janë në krye të detyrës për të zbardhur këtë ngjarje dhe për të mbajtur të sigurt qytetarët.

Shefi i Qeverisë ka shfrytëzuar konferencën të sulmojë “portale dhe analistë”, të cilat kanë vlerësuar, madje disa kanë paralajmëruar se para zgjedhjeve do të ketë tensione në veri.

Ai ka kërkuar nga qytetarët të mos ju besojnë këtyre portaleve “të cilat ata e dinë cilat janë”, por të informohen në rrugë “zyrtare”.

FJALA E PLOTË E KURTIT NË KONFERENCËN PËR SHTYP:

Të nderuara media të pranishme,
Të dashur qytetarë,

Sonte u desh të mblidhemi në këtë orë të vonë këtu në kryeministri, për të informuar opinionin publik mbi sulmet e fundit të rënda, kriminale, terroriste e dashakeqe që po vijojnë të na vijnë ne besojmë na vijnë nga fqinji ynë verior agresiv e armiqësor.

Vetëm ditëve të fundit, patëm sulm me granata dore në stacionin policor në Zveçan më 26 nëntor, mbrëmë u hodh mjet shpërthyes në afërsi objektit të Komunës së Zveçanit, e sonte ishte dhe akti e më i rëndë ku rreth orës 19:00, në afërsi të fshatit Vragë të Zubin Potokut, me mjete shpërthyese u dëmtua kanali kryesor i Ibër Lepencit, prej nga furnizohen me ujë disa qytete në Kosovë si dhe KEK-u për ftohjen e termoelektranave dhe prodhimin e energjisë elektrike.

Pra një pjesë e kanalit të Ibër Lepencit është dëmtuar nga një shpërthim i detonuar. Policia jonë tashmë është në vend të ngjarjes dhe në krye të detyrës. Furnizimi me ujë të pijes është ndërprerë përkohësisht, sipas edhe lajmërimeve e njoftimeve nga KRU Mitrovica. Ky është sulm kriminal dhe terrorist i cili ka synuar që ta dëmtojë infrastrukturën tonë kritike, mbase edhe më të rëndësishmen që e kemi dhe padyshim që ishte tentativë e rrezikimit të furnizimit me energji elektrike dhe ujë në vendin tonë.

U bëjmë thirrje qytetarëve që të jenë të qetë dhe të ndjekin në vazhdimësi udhëzimet dhe njoftimet nga institucioneve e Republikës së Kosovës. Organet shtetërore janë të angazhuara për të siguruar menaxhimin e situatës, rikuperimin e dëmit, dhe zbardhjen e plotë të rastit.

Sulmi është kryer nga profesionistë, është sulmi i radhës kriminal e terrorist që ne besojmë se vjen nga bandat e dirigjuara dhe të orkestruara nga Serbia e cila e ka edhe interesin edhe gatishmërinë edhe aftësinë për të shkaktuar sulme e dëmtime të këtilla, në rastin konkret duke përdorur një sasi të madhe të eksplozivit në një nyje kyçe ku riparimi është i vështirë. Nëse dëmi nuk riparohet atëherë një pjesë e Kosovës rrezikon të mbetet pa energji elektrike që në mëngjes.

Disa qytete dhe një pjesë e Prishtinës, rrezikojnë të mbeten pa ujë të pijshëm. Për bindjen tonë të fuqishme nuk mund të ketë adresë tjetër për përgjegjësi dhe fajësi për organizimin dhe orkestrimin e këtij sulmi përveç Beogradit zyrtar dhe strukturat e tyre kriminale të cilat më në krye Millan Radojçiq, mbështeten nga institucionet serbe, dhe nga presidenti i Serbisë Aleksander Vuçiq. Ai u ndalua për t’u liruar dhe tash është i lirë në Serbi dhe dirigjon me elementet paramilitare e kriminale atje, kriminelit të paqes e kriminelit të luftës që e urrejnë republikën tonë dhe popullin tonë mbarë.

Ky është pra shpërthimi i tretë në tre ditët e fundit që ka pasur për cak institucionet e vendit tonë dhe është synuar të nxitet frika dhe pasiguria së pari te banorët e katër komunave në veri të Ibrit, për ta përshkallëzuar situatën dhe më pastaj edhe mbarë vendin tonë.

Përpjekjet e këtilla do të ngelen të dëshpëruara për shkak se kushtetutshmëria në vendin tonë, sundimi i ligjit, rendi dhe populli e Republika jonë nuk do të mund të mposhten asnjëherë nga askush.

Situata si kjo shpesh janë edhe cak i fushatave të dezinformatave dhe keqinformimit të qëllimshëm, andaj ju ftoj që të jeni të vëmendshëm ndaj lajmeve që i shihni, lexoni, dëgjoni dhe t’i përcillni udhëzimet dhe njoftimet e institucioneve përmes kanaleve zyrtare.

Më lejoni që gjithashtu të falënderoj partnerët tanë ndërkombëtarë, Shtetet e Bashkuara të Amerikës dhe Bashkimin Evropian për mbështetjen e tyre ndaj vendit tonë.

Menjëherë pas kësaj konference për media unë do ta takoj edhe komandantin e KFOR-it, gjeneralmajorin Barduani, dhe do të mbajmë një mbledhje të jashtëzakonshme të Këshillit të Sigurisë së Republikës së Kosovës.

Në fund ju bëj thirrje qytetarëve që të refuzojnë të informohen nga disa portale që ata i njohin shumë mirë, e që fatkeqësisht ndonjëra më shumë e ndonjëra më pak janë bërë pjesë të një lufte hibride kundër Republikës së Kosovës, popullit të Kosovës dhe kombit shqiptar mbarë. Është e domosdoshme që të refuzojnë qytetarët e vendit tonë të mendojnë si disa opinionistë e disa opozitarë, të cilët i gëzohen dikush në mënyrë direkte e dikush në mënyrë indirekte asaj çfarë ndodhi sonte.

Pra duhet ta mbrojmë vendin tonë dhe kjo bëhet duke e dashur vendin tonë dhe kjo bëhet duke refuzuar të dezinformohemi e të keqinterpretojmë çfarëdo që ka ndodhur sonte dhe e rrezikon apo e kërcënon vendin tonë.

Le të jemi bashkë me institucionet e shtetit, me policinë tonë, me organet tona zyrtare të cilat do të na njoftojnë në kohë reale për gjithçka.

Këta kriminelë e terroristë nuk do të na mposhtin neve kurrë, sepse fuqia e ligjit të drejtë në Republikën demokratike të Kosovës do të ngadhënjejë sërish.