Kryeministri i Kosovës, Albin Kurti, në një postim të radhës për vrasjen e gruas shtatzënë, që ndodhi mbrëmë në oborrin ka kërkuar nga qtetarët e Kosovës, “e në veçanti shqiptarët të cilët e konsiderojnë veten patriotë”, se duhet ta ngrejnë zërin kundër burrave që ngrejnë dorë mbi gruan.

Në postimin me titullin “Marrëveshja xhentëllmene me dhunuesit familjarë”, Kurti thekson faktin se Kosova i ka më pak se 10 mijë policë e më shumë se 300 mijë familje.

Megjithëse e ka marrë drejtimin e Qeverisë qe gati dy vjet, Kurti thotë se gratë (dhe fëmijët e saj) po luftojnë brenda shtëpive të tyre private “pa mbështetjen e nevojshme publike”.

“Beteja për barazi gjinore nuk është çështje private”, shkruan ai më tutje.

POSTIMI I PLOTË:

Marrëveshja xhentëllmene me dhunuesit familjarë

Kosova i ka më pak se 10 mijë policë e më shumë se 300 mijë familje.

Dhuna në familje në Kosovë është më e përhapur sesa që e paramendojmë dhe pranojmë çdonjëri prej nesh. Dhunë ndaj grave dhe dhunë ndaj fëmijëve gjithandej. Me lëndime të thella shpirtërore e të dukshme fizike. Pothuajse secili qytetar në Kosovë e din dhe njeh së paku një familje ku kishte apo ka dhunë. A e ka lajmëruar atë dhe sa është interesuar për të, është një çështje tjetër pastaj. Shumësia e dhunuesve nëpër familje e ka sjellur familjarizimin me dhunuesit në shoqëri.

Kur vritet gruaja tashmë është bërë vonë. Zgjimi shoqëror edhe po ngjan vonë edhe po zgjat shkurt. Një a dy protesta të nesërmen, dhe: mirupafshim pas vrasjes së ardhshme. Gratë që vriten në familje janë ato që kanë rezistuar ndaj dhunës së burrit. Gratë që vriten janë gra që nuk kanë heshtur. Shoqëria jonë është përgjithësisht e heshtur për zërin e mbytur të atyre grave nga burrat vrasës. Gratë (dhe fëmijët e saj) po luftojnë brenda shtëpive të tyre private pa mbështetjen e nevojshme publike. Beteja për barazi gjinore nuk është çështje private.

Duhet të heqim dorë nga paragjykimi patriarkal “nderi burrëror – gruaja shërbëtore”. Aktet e dhunës vijnë nga sjelljet dhunuese që vijnë nga kjo mendësi e ‘padhunshme’. Qytetarët e Kosovës, e në veçanti shqiptarët të cilët e konsiderojnë veten patriotë, duhet ta ngrejnë zërin kundër burrave që ngrejnë dorë mbi gruan.

Kosova i ka më pak se 10 mijë policë e më shumë se 300 mijë familje.