Kryeministri i Kosovës, Albin Kurti, ka insistuar se ka rezerva dhe i ka ftuar qytetarët të mos bëjnë panik, derisa u ka bërë thirrje qytetarëve që kanë blerë më tepër miell se që ju duhet, që ta çojnë atë nëpër furra, raporton Ekonomia Online.

Kurti ka folur edhe sa i përket vendimit të Serbisë për të ndaluar eksportin e grurit e miellit ndër të tjera.

“Ka rezerva e rrjedhimisht nuk ka vend për panik. I ftoj qytetarët që të ndjehen të sigurt siç është edhe situata në vendin tonë. Unë i takova përfaqësuesit te Shoqatës së Mullisëve e më siguruan se në Kosovë edhe për dy muaj ka grurë që ende nuk është bluar e në muajin e kaluar kanë bluar grurë për tre muaj. Pra ka grurë 3 muaj plus dy muaj. Qytetarët që kanë blerë më shumë se që ju nevojitet ta çojnë miellin në furrë”, tha Kurti në konferencë për media.

“Asnjë kilogram miell nuk përdoret që ka ardhur nga Rusia e Ukraina. Çmimi i grurit në bursën ndërkombëtare është duke u rritur për shkak të luftës, por nuk jemi furnizuar prej atje. Me ministrin Faton Peci, ministren Rozeta Hajdari, do të bëjmë më të mirën përballë sfidave që do të ndodhemi. Ajo çka do të angazhohemi është për një inspektorat. Nuk ka vend për paniku e nuk kemi varësi ekzistenciale nga Serbia”, tha Kurti.

50 milionë euro për subvencione në bujqësi, 5 milionë prej tyre për naftën e fermerëve

Qeveria e Kosovës ka ndarë 50 milionë euro për subvencione në bujqësi këtë vit, ndërsa 5 milionë euro prej tyre janë dedikuar për naftën e fermerëve, raporton Ekonomia Online.

Këtë e ka bërë të ditur, kryeministri i Kosovës, Albin Kurti, në një konferencë për medie, së bashku me ministrin e Bujqësisë, Faton Peci. Sipas tij, konceptit të risive në programin e pagesave direkte, për herë të parë nga paslufta subvencionohet nafta për fermerët.

“Për herë të parë që nga paslufta, fermerëve dhe bujqve tanë do t’i subvencionohet nafta në vlerë prej rreth 5 milionë euro, duke ia subvencionuar vlerën prej rreth 0.36 cent për litër naftë të përllogaritur me hektarë të poseduar të tokës së punuar”, thuhet në këtë koncept.

Shefi i ekzekutivit ka thënë se 8 milionë euro do të ndahen për inpute bujqësore për plehërimin pranveror.

“Njëherit me një vlerë 8 milionë euro për grurin, misrin, fasulen dhe pataten do të subvencionojmë inputet bujqësore për plehërim pranveror në vlerë prej 150 euro për hektarë për grupin ndërsa me nga 100 euro për hektarë për misrin, fasulen dhe pataten. E do të ketë edhe rritje të mbështetjes për grurë me 474 euro për hektarë, 324 më shumë se vitin e kaluar, do të ketë 119 për qind më tepër rritje të mbështetjes për misër për dallim me vitin e kaluar, 118 për qind më tepër mbështetje për patate e fasule”, ka thënë Kurti.