Kryeministri Albin Kurti, u ka bërë thirrje komuniteteve jo shumicë në Kosovë që të marrin pjesë në regjistrimin e popullsisë, që pritet të fillojë me 1 nëntor, raporton Ekonomia Online.

Në këtë mënyrë, Kurti ka thënë se Qeveria do të mund të bëjë më mirë planifikime se sa shkolla u duhen komuniteteve, sa kilometra rrugë e ku të investojë ne ekonomi.

Në një takim me zyrtarë komunalë për Komunitete dhe Kthim, ai ka përmendur edhe disa nga veprimet e Qeverisë për komunitetet.

“Qeveria më e mirë është ajo më afër popullit. Jemi mirënjohës që ju kemi si zyrtarë komunale për komunitete dhe kthim afër qytetarëve tanë. Prandaj e kemi organizuar ketë takim për herën e pestë që ju të keni mundësi t’i shprehni mendimet e juaja”.

“Kemi ndare 3 milionë euro për komunitetet jo shumicë. MAPL ka ndarë 1 milion euro për projekte infrastrukturore veçanërisht për komunitetet. Ministria e Mjedisit i ka identifikuar 29 projekte, 9 prej të cilave janë për komunitetet jo shumicë. Një e arritur tjetër është edhe njohja e gjuhës rome si gjuhë zyrtare në Prizren. Kemi edhe linjën e re të autobusëve nga Prishtina ne Kishnice dhe Graçanicë, linjë që u hap dje”.

“Prioritet u kemi dhënë edhe vizitave në terren.  Regjistrimi i popullsisë do të fillojë me 1 nëntor, është obligim i çdo qytetari por edhe në të mirën e çdo qytetari. Me informatat qe do të mbledhin nga regjistrimi do të kemi mundësi të planifikojmë për nevojat e komuniteteve a sa shkolla na duhen, sa kilometra rruge e ku të investojmë në ekonomi. Kam ardhur të dëgjoj prej juve, për juve, për vendin tonë”.

Ministri për Komunitete dhe Kthim, Nenad Rashiq, tha se arsyeja e këtij takimi është qw t’i dëgjojnë komunitetet, kritikat dhe kërkesa e tyre.

Ai ka veçuar fondin e fundit të ndarë për komunitete prej 3 milionë eurosh, për të cilin tha se do ta rrisë mirëqenien e tyre.

“Do të kemi shumë sfida të ndryshme dhe kjo është arsyeja pse jemi mbledhur. Qw nga shkurti për here të pare kemi shpallur thirrje publike për të gjitha subvencionet, për ndërtimin e shtëpisë, materiale ndërtuese, mobileri, subvencione private”.

“Kemi pasur 3 500 aplikues, kjo tregon se është rritur transparenca. Kemi arritur të kemi edhe një fond shtesë që ka të bëjë më zhvillimin ekonomik, prej 3 milionë eurosh. Kjo është hera e parë që kemi një fond të tillë. Besoj se kjo do të ndikojë shumë në mirëqenien e komuniteteve”.