Kryeministri në detyrë Albin Kurti, vazhdon ta quaj çkapje shkarkimin e anëtarëve të Bordeve të Ndërmarrjeve Publike dhe zëvendësimin e tyre me anëtarë të Vetëvendosjes.

“Shkarkuam borde e emëruam të rinj. Kompania Rajonale e Ujësjellësit “Prishtina” Sh.A., “Posta e Kosovës” Sh.A. dhe “Hekurudhat e Kosovës – Infrakos” Sh.A., tash kanë borde të reja e profesionale. Këto borde janë të përkohshme të cilat do të merren me ç’kapjen e plotë nga shpërdorimi dhe luftimin e krimit e korrupsionit brenda tyre”, ka shkrur ai në Facebook.

Kurti ka thënë se në mbledhjen e 21-të të Qeverisë u miratua edhe një nismë për lidhjen e Marrëveshjes për ndihmë të ndërsjellë juridike dhe çështjeve penale ndërmjet Kosovës dhe Konfederatës së Zvicrës.

“ Ndihma e tillë do të ketë vëmendjen në sekuestrimin dhe konfiskimin e të ardhurave nga krimi, komunikimi i drejtpërdrejt në mes të organeve tona gjyqësore, grupeve të përbashkëta hetimore, Transferimin e Procedurës Penale, si dhe marrjen e dëshmive, duke përfshirë edhe marrjen e dëshmive përmes video-konferencës. Kështu, jemi të bindur që Sistemi i Drejtësisë do të forcohet sepse edhe do të pavarësohet”, ka shkruar ai.

Kurti ka folur edhe për marrëveshjen me “EURIMAGES”, duke thënë se kineastët në vendin tonë do të kenë shansin të përfitojnë  koroduksion filmik, program mbështetës për shpërndarjen e prodhimit, shfaqje në rrjetin e kinemave, promovim të autorëve, prodhimeve të tyre dhe barazisë gjinore, nga fondi i Këshillit të Evropës “EURIMAGES”.

“Mbrëmë u aprovua propozimi për t’u anëtarësuar për këtë fond. Tani, janë profesionistët e fushës ata që do ta përpilojnë sa më mirë e sa më në detaje domosdoshmërinë e këtij fondi”, ka shkruar Kurti.

Ai ka njoftuar edhe për shtesat e mësimdhënësve të mësimit online.

“Mësueset e Mësuesit, personeli i Shkollës Fillore dhe të Mesme të Ulët “Qamil Batalli” në Prishtinë, Shkollës Fillore dhe të Mesme të Ulët “Emin Duraku” në Prizren, ai i Ministrisë së Arsimit, Shkencës, Teknologjisë dhe Inovacionit, ai civil i Drejtorive Komunale të Arsimit në Prishtinë e Prizren, ata të cilët po e mundësojnë mësimin online me aprovimin e mbrëmshëm të qeverisë do të kenë pako shtesë. Puna e mësuesit është për nderimet më të larta e ajo në asnjë asnjë formë nuk mund të shpaguhet”, ka shtuar ai.

Po ashtu Kurti, ka njoftuar se do të fillojë të  shqyrtohet Projektudhëzimi administrativ për Përcaktimin e Procedurave për Shkatërrimin e Strukturave të Paligjshme.

“Strukturë e paligjshme konsiderohet ndërtimi i paligjshëm në pronën private e që është ndërtuar pa pëlqim të pronarit. Pra, me këtë udhëzim administrativ tregohet si duhet të bëhet zbatimi i vendimeve të plotfuqishme të Komisionit për kërkesa pronësore dhe Aktgjykimeve të panelit të ankesave në Gjykatën Supreme. Kjo është edhe kërkesë në procesin për integrim evropian”, tha ai.

Gjithashtu Kurti ka njoftuar se është miratuar edhe Vendimi për përjashtim nga fushëveprimi i Ligjit për Prokurimin Publik të Republikës së Kosovës, për shërbimet telekomunikuese që ofron “Telekomi i Kosovës Sh.A.”, si shërbime me rëndësi të veçantë shtetërore.