Sot në Komisionin për Ekonomi, Industri, Ndërmarrësi dhe Tregti është miratuar propozim rekomandimi i Mimoza Kusari-Lilës, lidhur me situatën e shkaktuar me devijimet elektro energjetike në katër komunat veriore të vendit.

Mimoza Kusari-Lila tha se është marrë vendim që të autorizohet KOSST-i që të merr përsipër devijimet e rrymës si rrjedhojë e furnizimit në Veri.

Ajo tutje u shpreh se kjo do të jetë për një afat të shkurtër kohor derisa Qeveria të fillojë procesin për me e siguru faturimin e rrymës.

“Nuk është e vërtetë ajo që është publikuar, nuk janë 11 milionë. Nuk u kan propozimi për me u nda ato po krejt tjetër përmbajtje ka pas qysh e kom publiku une.

Qaj vendimi qe e kom publiku është vendimi me të cilin është autorizu KOSST me i marr përsipër devijimet e rrymës që do të thotë cka ka devijime të rrymës si rrjedhojë e furnizimit në Veri me i mbulu KOSST-i me energji që është më e lirë natyrisht edhe që afati me qenë në periudhë të shkurtër kohore deri që qeveria të fillon procesin për me siguru faturimin e rrymës”.

Kusari-Lila tregoi që kërkesa për 11 milionë euro ka qenë kërkesë e tyre që nga fillimi, por se tani janë autorizuar të kryejnë pagesat me buxhet të tyre.

“Ne i kemi dhënë afat maksimumi gjashtë muaj. 11 milionëshi ka qenë kërkesë e tyre në fillim për një vit kështu qe kjo nuk është as për me i pagu faturat e rrymës por i kemi autorizu që ata me e kry këtë pjesë me buxhet të tyne që vjen si rrjedhojë e tregtimit të rrymës dmth nuk ndahen prej qeverisë qysh kanë kërku ata. Ata duhet me raportu në komision çdo muaj“.

Mimoza Kusari-Lila sqaroi edhe tërë propozim rekomandimet e miratuara:

1. NP KOSTT, duhet të paraqes para komisionit funksional, në baza mujore devijimet e energjisë elektrike në këto komuna (Mitrovicë e Veriut, Leposaviq, Zubin Potok dhe Zveçan) – për gjashtë (6) muajt e ardhshëm, duke filluar nga muaji prill 2021;
2. NP KOSTT, të paraqes në komision funksional, shpenzimet e energjisë elektrike në baza mujore retroaktivisht prej 1 janar 2018 – deri me 1 prill 2021;
3. NP KOSTT, duhet të paraqes në komision funksional, zgjidhjen mujore për devijimin e energjisë elektrike në katër komunat e Kosovës (Mitrovicë e Veriut, Leposaviq, Zubin Potok dhe Zveçan);
4. Autorizohet NP KOSTT të mbuloj devijimet e energjisë elektrike në katër komunat e vendit (Mitrovicë e Veriut, Leposaviq, Zubin Potok dhe Zveçan), sipas zgjidhjes së prezentuar dhe miratuar në komisionin funksional duke shfrytëzuar të hyrat nga buxheti vetanak, mjete këto të cilat do të kompensohen nga dividenda apo ndonjë mekanizëm tjetër i mundshëm.
5. Obligohet Qeveria e Kosovës, që brenda afatit gjashtë (6) mujor të sigurojë të gjithë procesin e futjes në sistemin e faturimit sipas rregullave dhe ligjeve në fuqi në bashkëpunim me palët përgjegjëse për faturimin e konsumatoreve në katër komunat e Republikës së Kosovës (Mitrovicë e Veriut, Leposaviq, Zubin Potok dhe Zveçan) me energji elektrike.