Flutura Kusari, juriste e të drejtës së medias, ka thënë për Ekonomia Online se përkeqësimi i lirisë së medias në Kosovë është njollë e zezë për vendin tonë.

Sipas Kusarit, Indeksi i Reporterëve Pa Kufij ka reflektuar “realitetin dhe sulmet e paprecedenta ndaj Klan Kosovës, ndaj RTK-së dhe KPM-së, të cilat janë bërë nga ana e pushtetit përgjatë vitit të kaluar”.

Ajo ka thënë se shpreson që ky raport do t’i “detyrojë” njerëzit në pushtet për të reflektuar dhe filluar një qasje të re ndaj mediave.

“Raporti është një njollë e zezë mbi vendin tonë e cila do duhej shumë kohë për t’u hequr. Ai reflekton realitetin dhe sulmet e paprecedenta ndaj Klan Kosovës përmes Projektligjit të KPM-së, ndaj RTK-së, ndaj KPM-së të cilat janë bërë nga ana e pushtetit përgjatë vitit të kaluar”

“Jemi në një situatë alarmante, në një situatë ku sulmi ndaj lirisë së medias dhe gazetarëve është bërë normaliteti i ri dhe shpresoj shumë që ky raport do të detyrojë njerëz në pushtet si Lëvizjen Vetëvendosje por edhe Guxo që të reflektojë dhe të fillojë me një qasje të re. Në të kundërtën, ndonëse gazetaria është ende e mundur në Kosovë, do bëhet vështirë dhe më vështirë nëse vazhdohet me qasjen e njëjtë”, ka thënë Kusari.

Juristja ka thënë po ashtu se ky është raporti i katër brenda shtatë-tetë muajve që Kosovën e paraqet kaq negativisht. Prandaj sipas saj, pika e parë që do duhej të ndodhte është dialogu mes qeverisë, parlamentit dhe shoqërisë civile.

“Ky është raporti i katër brenda shtatë tetë muajve që neve na qet kaq negativisht dhe është vlerësimi më negativ në dekadën e fundit, pika e parë që do duhej të ndodhte është dialog mes qeverisë, parlamentit dhe shoqërisë civile ne jemi në një situatë ku qeveria dhe parlamenti nuk duhen as të flasin me shoqërinë civile i nënvlerësojnë i ofendojnë i shajnë i fyejnë kështu që e para është që të ulem në një tavolinë dhe të diskutojmë për hapat që duhet ndërmerren dhe pastaj secila iniciativë duhet të bëhet duke respektuar rolin e shoqërisë civile gjë që nuk është duke ndodhur tani dhe nëse nuk e kemi këtë reflektim nuk do kemi përmirësim në vitin e ardhshëm”, ka thënë Kusari, për EO.

Ajo ka theksuar se duhet reflektim urgjent dhe serioz nga ana e njerëzve në pushtet për ta rregulluar këtë situatë.

“Ne kemi qenë gjithmonë të parët në listë sa i përket rangimit të rajonit ndërsa tani i jemi afruar Bosnjës dhe Serbisë edhe Shqipërisë bile Shqipëria dallon. Kështu që është treguar fakti që ne jemi afruar Bosnjës që konsiderohet shtet me problematika të mëdha dhe me Serbinë kur nuk ka liri të mediave dhe kjo dihet botërisht. Kështu që edhe kjo duhet të jetë një indikator shtesë përse duhet të kemi reflektim urgjent dhe serioz nga ana e njerëzve në pushtet”, ka theksuar Kusari.

Organizata “Reporterët Pa Kufij” thotë se Kosova përfshihet në grupin e vendeve ku mjedisi i medias është “problematik”, dhe se këtë vit ajo radhitet e 75-ta, 19 vende më poshtë nga viti i kaluar, kur u listua e 56-ta. Kjo organizatë ka shprehur shqetësim edhe për gjendjen e lirisë së shtypit në botë, e cila, sipas saj, po kërcënohet pikërisht nga ata që duhet të ishin garantuesit e saj, autoritetet politike.