Malazezët e Kosovës konsiderojnë se “Trepça” është pjesë e pandashme e sovranitetit të Kosovës dhe ajo u takon të gjithë qytetarëve të vendit.

Kryetari i Shoqatës së Malazezëve, Sllobodan Vujiçiq, thotë se përpjekjet për ta paraqitur “Trepçën” si pronë ekskluzive e serbëve, është një nga shumë manipulimet e Beogradit zyrtar dhe ndihmësve të tij në Kosovë si Lista Serbe, shkruan lajmi.net

“Ata çdo ditë me veprimet dhe retorikat e tyre, janë duke mashtruar popullin e tyre. Prandaj serbët e Kosovës duhet sa më shpejt të zgjohen dhe të heqin dorë nga ata që po i çojnë drejt shkatërrimit, për betejat e humbura dhe ëndrrat e paplotësuara”, deklaron Vujiçiq.

Ai ka shtuar se është koha që komuniteti serbë në Kosovë të pranoj realitetin dhe së bashku me komunitetet tjera të fillojnë të ndërtojnë një shtet në të cilin mund të krijohet një e ardhme për shoqërinë kosovare në tërësi.