Lubomir Mariq, i cili u shkarkua nga pozita e ministrit të Administrimit të Pushtetit Lokal në Qeverinë e Kosovës, tha sot në Beograd se kushdo që devijon nga prioritetet dhe objektivat e përbashkëta nuk do ta ketë përkrahjen e popullit.

“Për ne është i rëndësishëm një qëndrim unik. Ne të gjithë kemi të njëjtin qëndrim dhe të njëjtin qëllim – Bashkësinë e komunave serbe e cila duhet të jetë një prioritet për të gjithë”, tha Mariq, pas takimit që patën me kryeministrin serb Aleksandar Vuçiq.

Mariq tha se nuk ka përçarje në mesin e serbëve në Kosovë porse bëhet fjalë për individë.

I pyetur se pse u shkarkua, ai theksoi se përgjigjen për këtë duhet të japin ata që e kanë bërë një gjë të tillë.

Ish-ministri serb, po ashtu, tha se nuk ka marrë asnjë shpjegim në lidhje me shkarkimin e tij.

“Ajo që është dëgjuar është se Isa Mustafa nuk ishte i kënaqur me punën time dhe deklaratat politike”, tha Mariq, duke specifikuar se nuk ka përgjigje se pse kryeministri i Kosovës ka kërkuar që ta zëvendësojë atë.

Ai shtoi se ai e konsideron veten politikisht më të pjekur se Isa Mustafa, raporton “Tanjug”.

Duke folur për Mirjana Jevtiqin e cila ia zuri vendin e tij në Qeverinë e Kosovës thotë se ajo e ka bërë një gjë të tillë pa konsultim me shtetin serb.