Komisioni për Administratë Publike, Qeverisje Lokale dhe Media ka votuar propozim-ndryshimet në Projektligjin për dhënien në shfrytëzim dhe këmbimin e pronës së paluajtshme të komunës.

Kryetari i Komisionit Nait Hasani tha se ky propozim i jep rrugë komunës për zhvillim.

“Kryetarët e komunave janë njerëzit e vetëm qe janë të zgjedhur nga populli. Nuk janë në kundërshtim me asgjë janë në formën e zhvillimit pozitiv të komunave”, ka thënë Hasani, raporton Ekonomia Online.

Deputeti i Vetëvendosjes,  Adem Mikullovci tha se kryetarët e komunave përmes këtij propozimi kanë mundësi më shumë për keqpërdorime.

“Janë favorizuar shumë kryetarët e komunave sepse po ju jepen të drejtat edhe për keqpërdorime”, ka thënë Mikullovci.

Deputeti, Milaim Zeka tha se po i jepet të drejtë kryetarëve të vendosin për komunën e tyre.

“Komuna në mënyrë të drejtpërdrejt ka të drejt më negoicu për atë që është në dobi të komunës. Edhe buxheti është nda pak si me të njohshëm, dhe kjo jam i bindur që u jep hapësirë shumë të madhe kryetarëve të komunave për me vendos për komunën e tyre”, ka thënë Zeka.

E, Arban Abrashi, deputet i LDK-së, tha se përmes këtij projektligji i jepet rrugë zhvillimit  lokal.

“Unë mendoj që i hap rrugë zhvillimit lokal. Nëse vjen një investitorë ne komunë ne me i thonë po. Kur po ka dallavere në komunë kjo po bëhet në mënyrë jo transparente, bile këtu bëhet transparente. E kisha hekë dilemën që kryetarët po marrin shumë kompetenca”, ka thënë Abrashi.

Deputetja e PSD-së, Shqipe Pantina tha se përmes këtij ligji bëhet kontroll dhe balancë  për pushtet lokal.

“Ajo çka unë jam rehat në fund të ditës është se vendimet i merr Kuvendi komunal dhe kjo është një lloj kontrolli dhe balanci edhe tek pushtetet. Është një prej pak ligjeve qe kemi pas,  një lloj unanimiteti të padiskutueshëm”, ka thënë Pantina.