Fondacioni për të Drejtat e Kafshëve vlerëson se kufizimet e reja të lëvizjes me qëllim të parandalimit të rritjes së numrit të të infektuarve me COVID-19, janë më se të nevojshme, por kanë shpërfillur nevojat thelbësore për mbajtësit e kafshëve shoqëruese dhe kafshët e tyre.

Kjo organizatë ka kërkuar nga institucionet përgjegjëse që të rishikojnë kufizimin e lëvizjes për mbajtësit e kafshëve shoqëruese dhe të dalin me udhëzime të reja në mënyrë që të plotësohen nevojat
bazike të kafshëve.

“Ne bashkë ndjejmë me të gjitha institucionet dhe i përgëzojmë për punën e bërë në luftimin e kësaj pandemie e cila po i rrezikon të gjithë pa dallim.
Ndonëse e kuptojmë që masat e caktuara nga institucionet janë të domosdoshme dhe kanë për qëllim ruajtjen e shëndetit publik, këto kufizime diskriminojnë mbajtësit e kafshëve shoqëruese, e ç’është edhe më e rëndësishme, i minimizojnë skajshëm nevojat e kafshëve shoqëruese”, është thënë në reagim.

Kafshët tona shtëpiake, kanë nevojë që të dalin për nevojat e tyre fiziologjike dhe psikike, në ecjet e tyre edhe pse të kufizuara gjatë kësaj periudhe. Nuk mund t’i injorojmë nevojat bazike të kafshëve; është jo humane dhe shpërfillëse, nëse nuk i marrim parasysh nevojat e
qenieve të tjera që bashkëjetojnë me ne, si anëtarë të familjes.