Muhamet Mavraj, njëri ndër organizatorët e protestave të vitit 1997 deklaroi se kishte pasur ftesë nga kryeministri Albin Kurti që sot të merrte pjesë në homazhe te varri i profesorit Ejup Statovci dhe po ashtu edhe në takim me organizatorë të tjerë, por që ky nuk kishte pranuar të shkojë.

Për Klan Kosova ai deklaroi se arsyeja për këtë është që ai e ka edhe si parim që kur i ka shokët në pushtet nuk i shkon dhe nuk i përgjigjet ftesave të tyre për të shkuar as një kryeministri, as në shtëpitë e tyre e në takime zyrtare, sepse siç tha, “në fund të fundit jam edhe botues gazete”.

Përveç kësaj, Mavraj tha se është i zhgënjyer me Qeverinë për marrëveshjen e fundit të arritur mes Kosovës e Serbisë për çështjen e targave, dhe po ashtu edhe me disa vendime të Kurtit që ai i quajti të çuditshme.

“Disa nga ato janë të çuditshme, disa nga sjelljet e tij janë të çuditshme. Pjesëmarrja ne zgjedhje në Shqipëri ishte një budallallëk që s’matet me asgjë hiç, është e kotë, është një ftohje e panevojshme e marrëdhënieve me Shqipërinë”.

“Pastaj janë disa tone që s’janë të përshtatshme për marrëdhëniet tona me SHBA-të. Duhet krejtësisht ndryshe të ruhen miqtë, të ruhen aleatët, e shihni tash situatën se pa ta s’do të dilnim nga kjo situatë ku ne ishim, kemi mundur të dilnim shumë më keq se sa kjo marrëveshje që është tani sa i përket tabelave të veturave”.

“Mendoj se i duhen më shumë konsultime ose me shumë kthim ndoshta në atë frymën e shoqërisë së vjetër që të mos e humb rrugën. Shoqëria e vjetër është fryma që e kemi pasur gjithmonë, orientimi ynë ka qenë i saktë – NATO, SHBA, BE – ky trekëndësh nuk luan, dhe në këtë plan pak jam i shqetësuar.

“Sa i përket marrëveshjes së arritur për targat, jam zhgënjyer me zbritjen e nivelit të policisë speciale të Republikës së Kosovës në nivel me ato bandat që kanë bllokuar rrugët atje. Mendoj që kjo është e padrejtë ndaj policisë speciale. Siç e dini, ata do të tërhiqen njëkohësisht përgjatë tetë orëve dhe asnjëra palë nuk mund të tërhiqet një minutë para ose pas tjetrës dhe kjo më ka lënduar shumë”, përfundoi Mavraj.