Gjykata Themelore në Prishtinë ua ka vazhduar edhe për dy muaj të tjerë masën e paraburgimit dy të akuzuarve për mashtrim, Rrahim Hashimi dhe Kadri Rexhepi.

Vendimi për vazhdimin e paraburgimit ndaj të akuzuarve Hashimi dhe Rexhepi është marr në seancën e mbajtur më 27 dhjetor 2019, nga gjykatësja e rastit, Medie Bytyqi.

Në arsyetimin e këtij vendimi të cilin e ka siguruar “Betimi për Drejtësi”, thuhet se nëse të akuzuarit gjenden ne liri të plotë mund të pengojnë rrjedhjen normale të procedurës.

“Sipas këtij vendimi gjykata vlerëson se po të gjenden të akuzuarit në liri të plotë mund ta pengojnë rrjedhën normale të procedurës penale, ngase ka arsye për të besuar se ata do t’i asgjësojnë, fshehin, ndryshojnë ose falsifikojnë provat e veprën penale apo edhe të ndikojnë në bashkëpjesëmarrësin Ekrem Lika, i cili ende nuk është dëgjuar nga prokurori”, thuhet në vendim.

Po ashtu, thuhet se nëse të njëjtit gjenden në liri mund të arratisen për shkak të ndryshimit të rrethanave pas ngritjes së aktakuzës nga Prokuroria Themelore në Ferizaj PP.II.nr.335-7/2018 më 21 mars 2018, duke u mbështetur në faktin se Prokuroria Themelore në Prishtinë, Departamenti për Krime të Rënda është duke zhvilluar hetimet lidhur me veprën penale fajde, në të cilin rast është i njëjti i dëmtuar Faton Dalladaku.

Ndryshe, Gjykata Themelore në Prishtinë, më 14 gusht 2019, ndaj të akuzuarve kishte vazhduar masën e paraburgimit edhe për dy muaj deri më 28 tetor 2019.

Më pas, kjo gjykatë, më 28 tetor 2019, ndaj të akuzuarve sërish kishte vazhduar masën e paraburgimit edhe për dy muaj deri më 27 dhjetor 2019.

Kjo lëndë, fillimisht kishte filluar të gjykohej nga Gjykata Themelore në Ferizaj, por e njëjta me vendimin e nxjerrë më 6 gusht 2018, ishte shpallur jo kompetente në pikëpamje territoriale, ashtu që kjo lëndë i ishte transferuar Gjykatën Themelore në Prishtinë për vendosje.

Ndërsa, Gjykata Themelore në Prishtinë, kishte mbajtur shqyrtimin fillestar në këtë çështje penale më 26 qershor 2019, me ç’rast dy të akuzuarit ishin deklaruar të pafajshëm për këtë vepër penale.

Ndërsa, më 14 gusht 2019, gjykatësja Medie Bytyçi ka refuzuar kërkesat e ushtruara nga mbrojtësit për hedhje të aktakuzës dhe kundërshtim të provave.

Prokuroria Themelore në Ferizaj, më 21 mars 2018, ka ngritur aktakuzë ndaj Rrahim Hashimit dhe Kadri Rexhepit për shkak të veprës penale “Mashtrimi”, në bashkëkryerje, nga neni 335 par.5 lidhur me par.1 lidhur me nenin 31 të KPRK-së.

Sipas prokurorisë, në periudhën kohore prej 30 dhjetor 2011, deri më 24 korrik 2012, në Prishtinë, në zyrën e të dëmtuarit Faton Dalladaku, e cila gjendet në rrugën “Perandori Justinian”, në lagjen “Pejton”, të pandehurit Rrahim Hashimi dhe Kadri Rexhepi, së bashku me të pandehurin tjetër Ekrem Lika, i cili për momentin gjendet në arrati, me anë të paraqitjes së rreme të fakteve dhe me qëllim të përfitimit të kundërligjshëm të dobisë pasurore për vete ose për tjetrin, si dhe për t’i shkaktuar dëm personit tjetër, e kanë vënë në lajthim të dëmtuarin Faton Dalladaku.

Gjithnjë sipas prokurorisë, ata përmes të akuzuarit Kadri Rexhepi, prezantohen rrejshëm para të dëmtuarit dhe atë i akuzuari Rrahim Hashimi, si i afërm i Kadri Veselit dhe Xhavit Halitit, ndërsa i akuzuari Ekrem Lika si dhëndër i Kadri Veselit, ashtu që të tre së bashku kinse me qëllim të ndërmjetësimit për blerjen e Qendrës Kardiake të Kosovës SH.P.K në Prishtinë.

Prokuroria pretendon se ky ndërmjetësim pretendohej të realizohej kinse mes personit të quajtur Ekrem Lluka si shitës dhe Faton Dalladaku si blerës, ashtu që e nxisin të njëjtin të veprojë në dëm të pasurisë së tij, duke i prezantuar draft-kontrata sipas të cilave arrijnë ta bindin se i akuzuari Rrahim Hashimi, është pronar i Qendrës Kardiake të Kosovës, me 20 për qind të aksioneve, ndërsa Ekrem Lluka me 80 për qind, me ç’rast arrijnë të marrin nga i dëmtuari Dalladaku shumën e përgjithshme të të hollave prej 290 mijë e 810 euro, për të cilën shumë edhe i shkaktojnë dëm material.

Me këto veprime, prokuroria i ngarkon të akuzuarit Rrahim Hashimi dhe Kadri Rexhepi se kanë kryer veprën penale “Mashtrimi” në bashkëkryerje, nga neni 335, paragrafi 5, lidhur me paragrafin 1, lidhur me nenin 31 të KPRK-së.