Në parashtresat e mbrojtjes për konferencat për përgatitje për gjykim në rastin e Pjetër Shalës, thuhet se ende nuk kanë marrë gjithë materialet nga Prokuroria, derisa shtojnë se presin të jenë gati për gjykim në janar të vitit 2023.
Në këtë shkrese, mbrojtja pohon se aktualisht Zyra e Prokurorit të Specializuar (ZPS) nuk ka përfunduar zbulimet e saj, përfshirë materialet shfajësuese, dhe hetimet e Mbrojtjes janë ende në vazhdim.
Sipas mbrojtjes, pritet që lista e mbrojtjes e dëshmitarëve të mundshëm të rishikohet ndjeshëm dhe, si e tillë, është e parakohshme të komentohet për rendin dhe modalitetet në të cilat Mbrojtja synon të paraqesë dëshmitë e dëshmitarëve të saj.
Hetimet e mbrojtjes thuhet nuk kanë përfunduar dhe aktualisht janë në vazhdim.
“Mbrojtja do të duhet të kryejë misione të mëtejshme në terren dhe pret dokumentacion të rëndësishëm nga subjekte të ndryshme. Hetimet e Mbrojtjes shpesh përkeqësohen nga vështirësi të ndryshme praktike, duke përfshirë vështirësitë praktike në terren. Megjithatë, hetimet janë duke ecur, por kërkojnë kohë shtesë për t’u përfunduar. Mbrojtja pret që hetimet e saj do të duhet të vazhdojnë derisa ZPS të paraqesë rastin e saj”, thuhet tutje në këtë shkresë, shkruan Betimi për Drejtësi, transmeton.
Sipas shkresës, mbrojtja mund të konfirmojë se ajo parashikon zbulimin e provave shtesë dhe rishikimin e Përmbledhjes së Procedurës Paraprake dhe Listës së Dëshmitarëve të Mundshëm ndërsa hetimet përparojnë.
Ata thonë se dëshirojnë të kërkojnë një seancë të mbyllur ex parte për t’iu drejtuar panelit për çështje që kanë të bëjnë me gatishmërinë e tij për gjykim.
Sa i përket miratimit të mundshëm të një kuadri që rregullon trajtimin e informacionit konfidencial gjatë hetimeve dhe kontakteve me dëshmitarët, thuhet se mbrojtja vëren se, aktualisht, ekziston një marrëveshje interpartes për kontaktimin e dëshmitarëve dhe viktimave të ZPS-së, si dhe personave të intervistuar më parë nga ZPS-ja dhe nuk e konsideron të nevojshme miratimin e një kuadri në këtë fazë.
“Mbrojtja kërkon një vizitë në vendin e krimit, e cila do t’i ndihmojë trupit gjykues të vlerësojë provat në këtë rast dhe detyrat e tij për gjetjen e fakteve. Mbrojtja pohon se momenti i duhur për një vizitë të tillë do të ishte pas mbylljes së çështjes së Prokurorisë dhe para hapjes së çështjes së Mbrojtjes. Mbrojtja do të bëjë propozime konkrete për lokacione të shumta që duhet të vizitohen gjatë një vizite të tillë në kohën e duhur”, thuhet tutje.
Mbrojtja thuhet se nuk mund të konfirmojë aktualisht nëse do të prezantojë video, rindërtim 3D, harta dhe/ose fotografi të vendit të krimit.
“Mbrojtja pohon se, me kusht që të zgjidhen çështjet e pazgjidhura që do të diskutohen në një seancë dëgjimore ex parte, ajo pret të jetë gati në janar 2023.I akuzuari nuk kundërshton që ZPS-ja të lexojë një përmbledhje të Aktakuzës së Korrigjuar të konfirmuar në hapjen e rastit të Prokurorisë”, thuhet tutje nga mbrojtja.
Po ashtu, në shkresë thuhet se mbrojtja do të bëjë një deklaratë hyrëse në përputhje me Rregullën 126(2) të Rregullores direkt pas deklaratave hyrëse të ZPS-së dhe mbrojtjes së viktimave. Ndërsa, thuhet se rezervon të drejtën për të bërë parashtresa të mëtejshme pas mbylljes së çështjes së Prokurorisë. Ndërkaq, kanë bërë të ditur se nuk mund të konfirmojnë aktualisht se sa kohë do t’i duhet për deklaratat e saj hyrëse dhe çfarë mjetesh vizuale ose të tjera do të kërkohen.
Tutje, thuhet se mbrojtja nuk mund të konfirmojë aktualisht nëse i akuzuari do të bëjë një deklaratë të pabetuar në përputhje me Rregullën 142(1) të Rregullores.
“Mbrojtja mund të konfirmojë se do të paraqesë një rast. Lista e mbrojtjes e dëshmitarëve të mundshëm nuk është përfundimtare, do të rishikohet dhe, si e tillë, Mbrojtja aktualisht nuk është në gjendje të tregojë numrin e dëshmitarëve që synon të thërrasë. Mbrojtja megjithatë mund të konfirmojë se synon të thërrasë ekspertët. Aktualisht nuk mund të konfirmojë kohën e kërkuar për marrjen në pyetje të drejtpërdrejtë dhe as rendin me të cilin synon të thërrasë dëshmitarët e përfshirë në listën e tij”, thuhet tutje.
Për sa i përket mbrojtjes së alibisë, ata thonë se mbrojtja ia referon Trupit Gjykues parashtrimet e mbrojtjes mbi Alibi, të datës 1 korrik 2022. Ndërsa, thonë se mbrojtja nuk mund të konfirmojë aktualisht nëse do të mbështetet në pranimin e deklaratave ose transkripteve të dëshmitarëve të mëparshëm për qëllimet e çështjes së saj.
“Mbrojtja mund të konfirmojë se synon të kundërshtojë pranueshmërinë e provave jo gojore të zbuluara nga ZPS sipas Rregullës 102 të Rregullores për arsye të shumta, duke përfshirë në bazë të Rregullës 138(1) dhe Rregullës 138(2) të Rregullave”, thuhet tutje.
Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.
“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.