Mercedesi ka konfirmuar zyrtarisht datën e premierës së veturës së saj të ardhshme elektrike – modelin EQC, i cila do të mbahet më 4 shtator.

Premiera do të mbahet në Stockholm, kryeqytetin e Suedisë, ndërsa për publikun e gjerë premiera do të organizohet një muaj më vonë në panairin e veturave që do të mbahet në Paris nga 4 deri 14 tetor, transmeton Koha.net.

Ky model është paralajmëruar që nga viti 2016, si koncepti Generation EQ. Modeli i tij serik do të jetë përafërsisht me madhësi të njëjtë sikurse GLC aktual.

Modeli serik, për dallim nga versioni si koncept, do të karakterizohet me dritat e përparme ndryshe dhe maskën e re, si dhe duhet theksuar se prodhimi dhe shitja e tij pritet të fillojë vitin e ardhshëm.

Ky prodhues prestigjioz gjerman, më herët pati njoftuar se EQC ka kaluar testimet dimërore suksesshëm në veri të Suedisë (në temperaturën deri minus 35 shkallë celsius) si dhe testimet verore në Spanjë.

Mercedes EQC do të ketë platformën e veçantë të zhvilluar për veturat elektrike. Po ashtu, ai do të ketë dy motorë elektrikë me 300 kW/408 kuajfuqi në total dhe baterinë deri 70 kWh përmes së cilës me vetëm një karikim do të mund të kalojë deri në 500 kilometra, përcjell Koha.net. Sipas disa të dhënave, thuhet se EQC do të mund të arrijë shpejtësinë nga 0 deri në 100 kilometra në orë për më pak se 5 sekonda.

Mercedesi është njëra nga shumë kompanitë të cilat kanë paralajmëruar veturat elektrike për vitet e ardhshme, kështu që ajo deri në vitin 2022 do të lansojë plot 10 vetura të reja elektrike. Po ashtu, ky prodhues gjerman njofton se së bashku me modelet plug-in hibride dhe me sistem 48-voltësh në ofertën e saj do të ketë 130 vetura elektrike.

Gjithashtu, Mercedesi parashikon që deri më 2025-ën në tregun e veturave elektrike të përfshihen 15 deri 25 për qind shitjet e saj në total.