Presidentja e Parlamentit Evropian, Roberta Metsola, tha se ata janë të vetëdijshëm për sfidat dhe pasojat që ngjarjet e fundit në veri të Kosovës mund të kenë në stabilitetin e rajonit. Prandaj ajo ka theksuar nevojën e de-eskalimit të situatës atje.

Metsola i bëri komentet në një fjalë të shkurtër që mbajti para adresimit të presidentes së Kosovës, Vjosa Osmani, në seancën plenare të Parlamentin Evropian.

Tutje, presidentja e PE-së tha se duhet që dialogu të vazhdojë për të siguruar rezultate të prekshme për të gjithë, raporton Ekonomia Online.

“Demokracia, liria e shprehjes dhe sundimi i ligjit janë vlera fundamentale që ky parlament qëndron fuqishëm me to”.

“Rrugëtimi i Kosovës vazhdon dhe kjo shtëpi mirëpret përpjekjen e vendit tuaj për t’u ballafaquar me sfidat drejtpërdrejt, nevojën për të ndërmarrë hapa për ta qetësuar situatën, për të bashkëpunuar me partnerë dhe duke investuar në projekte ndërkufitare dhe partneritet”.

“Ky parlament do që të dëgjojë nga populli i Kosovës se si është më së miri të krijohet prosperiteti ekonomik, mundësitë dhe stabiliteti afatgjatë dhe progresi në rajonin tuaj”.