Vetëm një milionë euro përfshirë edhe bonuset e ndajnë Milanin nga rinovimi me Hakan Calhanoglu.

Pas shumë muajsh bisedime më në fund palët janë drejt arritjes së një marrëveshjeje që do ta mbajë turkun në Milano në pjesën kuqezi edhe për disa vite të tjera.

Calhanoglu është në skadencë kontrate me Milanin në fund të këtij sezoni dhe deri tani mesfushori turk nuk kishte pranuar ofertat që i kishin bërë drejtuesit e klubit për rinovimin, pasi nuk ishte dakort me pagën që i ofronin.

Gjithsesi diferencat tashmë janë më të ulta pasi Milani tashmë e ka rritur ofertën në 4 milionë euro në sezon nga 5 milionë eurot që kërkon agjenti i numrit 10 të kuqezinjëve Gordon Stipic.

Gjithsesi me bonuset oferta e Maldinit dhe Massarës mund të kapë shifrën e 5 milionëve dhe hedhja e të zezës mbi të bardhë nga Calhanoglu është shumë afër. Që nga vera e vitit 2017 kur erdhi nga Bayer Leverkusen për 23 milionë euro Calhanoglu ka qenë një pikat më të forta në mesfushën e Milanit, ndërkohë që në këtë sezon është aktivizuar në 28 takime në të gjitha kompeticionet nga Pioli duke realizuar dhe 6 gola.

Në momentin që do të zyrtarizohet rinovimi me 27-vjeçarin turk drejtuesit e Milanit do të nisin bisedimet me Mino Raiolën për zgjatjen e kontratës me Gigio Donnarummën me portierin që do të kthehet në prioritetin kryesor për zyrtarët e klubit kuqezi.