Pas takimit mes Donald Trump dhe Benjamin Netanyahu në Uashington, ministrat e qeverisë izraelite shprehën kënaqësinë për mesazhet e Trumpit në lidhje me Rripin e Gazës.

Komentet vijnë pasi Trump deklaroi se ai dëshiron që Shtetet e Bashkuara të “marrin përsipër” dhe të “pronësojnë” Rripin e Gazës, pasi gjithashtu bëri thirrje për zhvendosjen e të gjithë popullsisë së enklavës palestineze.

“Kjo është ajo që ndodh kur dy liderë të guximshëm takohen,” tha ministri i Transportit Miri Regev.

Ministri i Energjisë Eli Cohen thotë se ky është “një mëngjes historik për shtetin e Izraelit, Lindjen e Mesme dhe botën”.

Kryetari i Knesset Amir Ohana e përshkruan atë si “agimi i një dite të re”.

“Ne kemi një kryeministër të madh dhe një president të jashtëzakonshëm amerikan! Faleminderit Zotit për këtë mrekulli që ka bërë për popullin izraelit”, shkroi ministri izraelit i Kulturës dhe Sportit, Miki Zohar.

Ministri i Financave Bezalel Smotrich tha: “Së bashku do ta bëjmë botën të mrekullueshme përsëri”.

Ligjvënësi izraelit i ekstremit të djathtë, Itamar Ben Gvir, i ka bërë thirrje kryeministrit Benjamin Netanyahu që të miratojë një plan për të dëbuar palestinezët nga Gaza, pasi presidenti amerikan Donald Trump tha se nuk shihte të ardhme të qëndrueshme për ta në Rrip.