Ministri i Drejtësisë, Selim Selimi sot është takuar me Ambasadoren e Francës në Kosovë, Marie-Christine Butel me të cilën ka diskutuar për çështje të cilat lidhen me reformën në drejtësi.

Ministri Selimi e ka njoftuar Ambasadoren Butel për disa procese prioritare të Ministrisë së Drejtësisë siç është Rishikimi Funksional i Sundimit të Ligjit, ecurinë e ligjit për funksionalizimin e Gjykatës Komerciale, procesin e hartimit të raportit nga Grupi Punues për llogaridhënie duke përfshirë edhe Vettingun si dhe legjislacionin lidhur me fuqizimin e luftës kundër korrupsionit.

Në kuadër të takimit, në funksion të fuqizimit të bashkëpunimit ndërmjet dy vendeve, Ministri Selimi dhe Ambasadorja Butel, kanë diskutuar për mundësinë e zhvillimit të një vizite të Agjencisë Kundër Korrupsion në Francë, vazhdimin e programit të trajnimit të gjyqtarëve dhe prokurorëve kosovarë në Shkollën Kombëtare të Magjistraturës për Gjyqësor në shtetin francez. Me këtë rast Ministri Selimi ka kërkuar ndihmën e Francës për profesionet e lira, si dhe lidhjen e odave kosovare dhe franceze, gjë që sipas tij do të ndihmonte për të mësuar nga përvojat dhe praktikat e avancuara të Francës në këtë fushë.

Ministri Selimi përmes ambasadores franceze në Prishtinë, ka bërë ftesë që Ministri i Drejtësisë së Francës dhe një grup i ekspertëve të fushës së drejtësisë, të vizitojnë Kosovën, me qëllim që të njihen nga afër me progresin e Kosovës në fuqizimin e sundimit të ligjit, por edhe për sfidat të cilat do të mund të adresoheshin së bashku.

“Ne jemi të bindur se e meritojmë liberalizimin e vizave, jo vetëm për shkak të përmbushjes së të gjitha kritereve, por edhe sepse Kosova është e pakompromis në konsolidimin e sistemit të saj të drejtësisë”, ka thënë Ministri Selimi. 

Ministri Selimi dhe Ambasadorja Butel duke e vlerësuar si shumë të mirë bashkëpunimin ndërmjet Kosovës dhe Francës në fushën e drejtësisë, kanë shprehur vullnetin për të vazhduar negociatat për marrëveshjen për ekstradim dhe bashkëpunim juridik ndërkombëtar.

Ministri Selimi falënderoi Ambasadoren Butel për mbështetjen e vazhdueshme që ka ofruar Franca në fushën e drejtësisë, ndërsa Ambasadorja znj. Butel falënderoi ministrin Selimi duke thënë se Franca do të vazhdojë të mbështes Kosovë edhe më tutje në fushën e sundimit të ligjit dhe proceset që ndërlidhen me reformën në drejtësi.