Ministri Veliu vizitoi Akademinë e Kosovës për Siguri Publike

Prishtinë | 16 Kor 2020 | 15:13 | Nga Ekonomia Online

Ministri i Punëve të Brendshme, z. Agim Veliu vizitoi Akademinë e Kosovës për Siguri Publike ( AKSP ), ku u prit nga drejtori i Përgjithshëm i AKPS-së , z. Ismail Smakiqi.

Me këtë rast ministri Veliu u njoftua për së afërmi me punën e AKSP-së dhe sfidat që janë duke i kaluar ata gjatë periudhës së pandemisë Covid-19.

Ministri Veliu në këtë takim shprehi gatishmërinë e tij për të mbështetur këtë institucion që tashmë njihet ndërkombëtarisht. Ai gjithashtu falënderoi partnerët ndërkombëtarë që kanë dhënë kontribut të vazhdueshëm në përkrahjen e këtij institucioni dhe u zotua për përkrahjen e Akademisë në proceset e akreditimit të cilat e presin në periudhën e ardhshme.

Në anën tjetër, z. Smakiqi bëri një prezantim të shkurtër të AKSP-së, ku e njoftoi z. Veliu që implementimi i programeve dhe trajnimeve të dizajnuara në bazë të standardeve më të larta ndërkombëtare për të drejtat e njeriut dhe sundimit të ligjit, do të jenë primare dhe obligative për të gjithë, në mënyrë që të arrihet profesionalizëm më i lartë në shërbim të vendit dhe qytetarëve. Gjatë kësaj vizite, ministrit Veliu iu prezantua ushtrimi praktik me instruktor, ku kadetët e FATS-it patën rastin të demonstrojnë ushtrimin me armë zjarri, si dhe vizitoi klasën ku po mbahen trajnimet online me kadet.

Të ngjashme